Минтимер Шәймиев 75-яшьлек туган көне уңаеннан котлаулар кабул итә

Россия Федерациясе Президенты Дмитрий Медведев һәм Россия Федерациясе Хөкүмәте Рәисе Владимир Путин Татарстан Республикасы Дәүләт Киңәшчесе Минтимер Шәймиевне 75 яшьлек юбилее белән котлады.

“Сез 18 елдан артык Татарстан Республикасы Президенты вазифасын биләдегез, республиканың динамик социаль-икътисади үсеше, кешеләрнең яшәү дәрәҗәсен арттыру өчен күп эш башкардыгыз. Җәмгыятьтә конфессияара татулыкны һәм тынычлыкны ныгытуга зур өлеш керттегез. Үз эшегезгә җаваплы каравыгыз, дөрес карарлар кабул итә белүегез һәм бай сәяси тәҗрибәгез аркасында, Сез илебездә зур абруй казандыгыз. Сез үткән юл – Ватанга тугрылыклы хезмәт итүнең якты үрнәге”, - диелә Дмитрий Медведевның телеграммасында.

Владимир Путин үзенең котлавында болай дип ассызыклады: “Сез талантлы, бетмәс-төкәнмәс иҗади потенциалга ия кешеләр, чын лидерлар рәтенә керәсез. Сезнең Татарстанның һәрьяклап үсеше, Россия дәүләтчелегенең формалашуы, милләтара тынычлыкны һәм татулыкны ныгытуга керткән гаять зур өлешегез тирән хөрмәткә лаек. Сез кыенлыклардан беркайчан да курыкмадыгыз – хәтта иң катлаулы хәлләрдә дә үз фикерегездә калдыгыз. Мондый җаваплылык хисе, эзлекле позиция һәм, әлбәттә, шәхси сыйфатларыгыз аркасында Сез зур хөрмәт казандыгыз. Сезнең һөнәри осталыгыгыз, сәяси зирәклегегез һәм зур тәҗрибәгезгә алга таба да Татарстан Республикасы һәм бөтен Россия мәнфәгатьләрендә ихтыяҗ булыр дип өметләнәм”.

Минтимер Шәймиев Төркия Республикасы Президенты Абдуллаһ Гүл һәм Беларусь Республикасы Президенты Александр Лукашенкодан да телеграммалар алды.

ТР Дәүләт Киңәшчесен шулай ук РФ Федераль Җыены Федерация Советы Рәисе Валентина Матвиенко, РФ Хөкүмәте Рәисенең беренче урынбасары Игорь Шувалов, РФ Дәүләт Думасы Рәисе урынбасары Олег Морозов, РФ авыл хуҗалыгы министры Елена Скрынник, Башкортстан Республикасы Президенты Рөстәм Хәмитов, Ингушетия Республикасы башлыгы Юныс-Бәк Евкуров, Свердловски өлкәсе губернаторы Александр Мишарин, Кемерово өлкәсе губернаторы Аман Тулеев, Курган өлкәсе губернаторы Олег Богомолов һәм илнең башка төбәкләре башлыклары, Россия һәм Татарстан министрлыклары һәм ведомстволары җитәкчеләре тәбрик итте.

Минтимер Шәймиевкә Россия Мөфтиләр шурасы рәисе Равил Гайнетдин, Россия мөселманнарының Үзәк Диния нәзарәте рәисе Тәлгать Таҗетдин, Кавказ мөселманнары Диния нәзарәте рәисе, Берләшкән Дәүләтләр Бердәмлегенең Динара Советы рәистәше Аллаһшөкер Паша-Задә, Россия Театр әһелләре берлеге рәисе, Россиянең халык артисты Александр Калягин һәм башка җәмәгать эшлеклеләре, халыкара оешма вәкилләре, танылган мәдәният, сәнгать һәм фән эшлеклеләре, Россия һәм Татарстанның финанс даирәләре һәм бизнес вәкилләре, Россия Федерациясенең төрле төбәкләрендә һәм чит илләрдә яшәүче ватандашлар котлау телеграммалары юллады.