Татарстанның электрон сәүдә мәйданчыгы камилләштереләчәк

Татарстанның электрон сәүдә мәйданчыгы эшендәге җитешсезлекләр якын көннәрдә бетереләчәк. Республика Президенты Рөстәм Миңнеханов әлеге уңайдан тиешле күрсәтмәләр бирде. Бүген ТР Министрлар Кабинетында узган киңәшмәдә ул әнә шул хакта хәбәр итте.

Республика башлыгы билгеләп үткәнчә, соңгы вакытта электрон сәүдә мәйданчыгы буенча кайбер сораулар туган. Шуңа бәйле рәвештә кичә җитешсезлекләрне бетерү буенча тиешле чаралар күрү уңаеннан киңәшмә узды. Мисал өчен, Президент хәбәр иткәнчә, дәүләт һәм муниципаль сатып алуларда электрон инструменттан файдаланырга тиешле кешеләрне укыту эше начар оештырылган. "Киләсе атнада без 4-5 зона укыту үзәге оештырачакбыз, алар даими тәртиптә, шулай ук шимбә һәм якшәмбе көннәрендә дә эшләячәк, - диде Рөстәм Миңнеханов. - Без кемнең кайда беркетелүе хакында муниципаль берәмлекләргә хәбәр итәчәкбез".

"Без мондый зур күләмдә мәгълүмат алырбыз дип уйламаган идек. Мәгълүматларның төп өлешен 17.00 сәгатьтән соң тапшырсагыз яхшырак булачак, - дип мөрәҗәгать итте Р.Миңнеханов республика районнарына. - Мин әлеге уңайсызлыклар өчен гафу үтенәм, 15 майдан соң без яңа серверлар алачакбыз һәм мондый чикләүләр булмаячак".

Электрон мәйданчыкның белешмәләр алу өчен call-телефон үзәге дә барлык шалтыратуларны кабул итә алмый. "15 апрельдә 18 шалтырату килеп җитмәде - бу нормаль хәл түгел. Мин кешеләрнең санын арттырырга күрсәтмә бирдем, - дип хәбәр итте Рөстәм Миңнеханов. - Моннан тыш, без махсус сайт булдырачакбыз, анда да сораулар бирергә мөмкин. Әлеге сорауларга элетрон сәүдә мәйданчыгы операторы җавап бирергә тиеш".

Сатып алына торган материалларның кодлары буенча да проблемалар бар - республика кодлары, аерым алганда, Торак-коммуналь хуҗалыгын реформалаштыруга ярдәм күрсәтү фонды кодларына туры килми. Республика Президентының сүзләренә караганда, хәзерге вакытта кодларны тәңгәлләштерү эше алып барыла.

Кайбер җитешсезлекләргә дә карамастан, Татарстанда электрон сәүдә мәйданчыгын файдаланудан баш тартырга җыенмыйлар. "Кыенлыклар булса да, әлеге системага ихтыяҗ зур һәм без аннан файдаланачакбыз", - дип ассызыклады Рөстәм Миңнеханов.