Фәрит Мөхәммәтшин: “Без бюджетны дефицитсыз итә алмыйбыз”

“Бу сессия гадәти булмаячак”, - дип белдерде бүген спикер Фәрит Мөхәммәтшин парламентның Президиумында дүртенче чакырылыш ТР Дәүләт Советының өченче утырышы хакында. Билгеле булганча, агымдагагы елның 28 маенда узачак сессиянең көн тәртибенә Татарстанның 2009 ел бюджетына үзгәрешләр кертү һәм республика бюджеты белән бәйле башка закон проектларын карау көтелә.

Фәрит Мөхәммәтшин бүген журналистлар белән аралашу вакытында 2009 елның бюджетына үзгәрешләр кертү мәсьәләсенең күптәннән торуын ассызыклап үтте. “Безнең бюджет узган елның октябрь-ноябрь айларында каралды һәм кабул ителде. Билгеле булганча, Татарстан бюджетына беренче кварталда планда каралган 6 миллиард сумнан артык керем керми калды. Без үзебезнең халыкны, сайлаучыларыбызны алдый алмыйбыз. Тормышчан бюджет кирәк. Аны төрле яктан карап, Хөкүмәт керем ягын да, чыгым ягын да киметергә тәкъдим кертте. Шуңа күрә без кайсыбер программаларны финанслауны киметәбез, төзелә башлаган объектларны туктатып торабыз”, - дип аңлатып үтте спикер. Парламент башлыгы сүзләренчә, бюджетның социаль яктан якланган маддәләрен саклап калу зарур.

Алдан хәбәр ителгәнчә, республиканың 2009 ел бюджетының керем өлешен - 65 млрд. 886,9 млн.сум, чыгым өлешен 85 млрд. 833,7 млн. сум итеп расларга тәкъдим ителә. Нәтиҗәдә 20 млрд. сумга якын дефицит килеп чыга.

Бу нисбәттән Фәрит Мөхәммәтшин: “Без бюджетны дефицитсыз итә алмыйбыз. Дефицит Хөкүмәтне, хакимиятнең башка органнарын аны тулыландыру юлларын эзләргә мәҗбүр итә. Әгәр без чыгымнарны 20 миллиард сумга киметсәк, халыкны социаль яктан яклаган маддәләргә зыян киләчәк. Безне моңарчы кабул ителгән гамәлдәге программаларның быел финансланудан туктавы борчый. Әлеге программалар эшләми торачак. Без, Хөкүмәт белән килешеп, җәйге мәктәпяны лагерьларын, укытучыларны җәйге каникулларга ял акчалары биреп озату мәсьәләләрен саклап кала алдык”, - диде.

Бүген Президиум утырышында КПРФтан сайланган депутат Хафиз Миргалимов бюджет проектын башта парламент тыңлауларына чыгарырга тәкъдим итте. Парламент башлыгы бюджет проектына нисбәтле фикер алышуларның сессиягә кадәр комитетларда һәм фракцияләрдә булачагын, депутатлардан кергән тәкъдимнәрнең закон проектын караганда исәпкә алыначагын белдерде. “Безнең максат – халыкка кагылышлы маддәләрне саклап калу”, - диде Фәрит Мөхәммәтшин.