Минтимер Шәймиев Пакистан Ислам Республикасының РФ дә Гадәттән тыш һәм Тулы вәкаләтле илчесе Мостафа Камал Казый белән очрашты

5 апрель көнне Татарстан Республикасы Президенты Минтимер Шәймиев Казан Кремлендә, Пакистан Ислам Республикасының РФ дә Гадәттән тыш һәм Тулы вәкаләтле илчесе Мостафа Камал Казыйны үзендә кабул итте.

Илче белән әңгәмәсендә Минтимер Шәймиев республикага иң борынгы цивилизация туган илдән килгән кунакны кабул итүенә шат булуын белдерде. Шулай ук ике республика арасында үзара хөрмәт һәм икеяклы кызыксыну хөкем сөргәненә дә рәхмәтен җиткерде. «Бездә барлык гарәп илләре белән, шул исәптән, Пакистан белән дә хезмәттәшлек күләмен киңәйтү теләге чиксез зур», — дип ассызыклады ул. Минтимер Шәймиев, үзе белән бергә ТР делегациясенең Согуд Гарәбстаны, Сирия һәм Кувейт илләренә эшлекле сәфәре барышында, бу илләр житәкчелеге тарафыннан Татарстанга карата зур кызыксыну уянганын билгеләп үтте. «Анда без тәкъдим иткән барлык фикерләрне дә ихтирам белән кабул иттеләр һәм сөйләшүләр дә нәтижәле булды», — диде ул.

Бүгенге очрашуда Татарстан һәм Пакистан арасындагы хезмәттәшлекнең киләчәге, аеруча, машина төзелеше тармагы буенча үзара мөнәсәбәтләр язмышы мәсьәләсе хакында да фикер алышу булды. Агымдагы елның башында «КАМАЗ» ачык акционерлык җәмгыятенең, Пакистанның Карачи шәһәрендә җыю җитештерүчәнлеге старт алган. Аның рәсми ачылышы апрель-май айларында көтелә. Ел дәвамында Пакистанга 100 дән артык җыю комплекты кую ниятләнә. Автогигантның максатларында — Пакистанда елга 1500-2000 данә машина чыгару да бар. «КАМАЗ» продукциясенең төп кулланучыларына килгәндә, алар Пакистанның Милли транспорт компаниясе һәм вак шәхси фирмалар.

Мостафа Камал Казый Татарстанда сәяси һәм икътисадый тотрыклылыкның кулга-кул тотынышып тамыр җәюен билгеләп үтте. Ул үзенең Казанда тәүге мәртәбә булуын хәбәр итте. Санкт-Петербургка визитыннан соң, бу аның РФ төбәкләренең берсенә икенче сәяхәте. «Татарстан миндә көчле тәэсирләр калдырды һәм ул ике дин — ислам һәм православие дуслыгы үрнәге булып тора», — дип горурлыгын белдерде. РФ Президентына ышандыру грамоталарын тапшыргач, узган елның апрель аеннан Мостафа Камал Казый РФ дә Пакистан Ислам Республикасының Гадәттән тыш һәм Тулы вәкаләтле илчесе булып билгеләнгән.

Очрашуда шулай ук ТР Президенты каршындагы халыкара мәсьәләләр буенча дәүләт киңәшчесе — ТР Президентының Тышкы элемтәләр Департаменты директоры Тимур Акулов, ТР Сәүдә һәм тышкы икътисадый хезмәттәшлек министрының беренче урынбасары Линар Латыйпов, «Казан вертолет заводы» ачык акционерлык җәмгыяте Генераль директоры урынбасары Валерий Карташев катнашты.

Илченең Казандагы сәяхәте программасы кысаларында башкала күрке булып торган Кол Шәриф мәчетенә, Благовещенски Соборына, «Идея» технопаркына, Россия Ислам Университетына бару, ТР Президент Аппараты каршындагы Дәүләт хезмәте институты студентлары, «КАМАЗ» ачык акционерлык җәмгыяте вәкиллеге белән очрашу һәм башка чаралар каралган.