ТР парламенты Регламенты Дәүләт Советының ике дәүләт телендәге эшчәнлегенә игътибар бирә

20 май көнне ТР парламентының Законлылык һәм хокук тәртибе комитеты депутатлары Татарстан Республикасы Дәүләт Советы Регламенты проектын тикшерде. Регламент проекты белән депутатларны парламентның Хокук идарәсе башлыгы Андрей Ощепков таныштырды. Аның сүзләренчә, әлеге проект депутатларның тәкъдимнәрен алып, эшче төркеме тарафыннан төзелгән.

Регламент проектында Дәүләт Советы һәм аның органнарының (моңа Президиум, комитетлар һәм башкалар керә) ике дәүләт - татар һәм рус телләрендәге эшчәнлегенә аеруча игътибар бирелә. Регламентның 3 нче маддәсенә "ТР Дәүләт Советы, Дәүләт Советы Президиумы, комитетлар һәм комиссияләр, парламенттагы депутат берләшмәләре утырышларында, парламент тыңлаулары уздырганда эш ике дәүләт телендә алып барыла" дигән норма кертелә. Ягъни кирәк вакытта эш барышында татар теленнән рус теленә, рус теленнән татар теленә синхрон тәрҗемә белән тәэмин итү каралган.

Моннан тыш ТР Дәүләт Советына закон проектларын кертү тәртибенә дә үзгәрешләр тәкъдим ителә. Аерым алганда, закон проекты тексты, аңлатма язуы, башка документлар һәм материаллар Татарстан Республикасының ике дәүләт телендә кертелергә тиеш.

Яңартылган Регламентта ТР Дәүләт Советы Секретаренең вәкаләтләре аныкланган. Аның вәкаләтләреннән ТР Дәүләт Советы секретариаты белән җитәкчелек итү төшереп калдырылган.

Регламентка шулай ук комитетлар утырышларын уздыруның вакытына кагылышлы норма кертелгән. Алар кирәк булганда, ягъни ике айга бер тапкырдан да кимрәк җыелмый.

Проектта ТР Дәүләт Советының, федераль законга үзгәрешләр керү сәбәпле, республика законнарын тәңгәлләштерү белән бәйле эш тәртибе дә күрсәтелә.

Моннан тыш, парламент сессияләрендә закон проектын караганда ТР Иҗтимагый палатасы тәкъдимнәре дә тыңлана.

Регламентның 120 нче маддәсендә ТР Дәүләт Советының агымдагы елга якынча эш планын төзү тәртибе билгеләнә.