Мәктәп тәмамлаучылар "Татнефть-Арена"да "Соңгы кыңгырау"ны бәйрәм итте

Быел Казанның мәктәп һәм гимназияләрен тәмамлап чыгучы егетләр һәм кызлар бүген "Татнефть-Арена" Боз спорт сараенда "Соңгы кыңгырау" бәйрәмен билгеләп үтте.

Нәрсә ул мәктәп һәм ул сиңа нәрсә бирде? Үткән мәктәп елларына борылып карап, Казанның кичәге укучылары мәктәпләрдә төшерелгән видеоязма аша фикер алыша: мәктәп - ул аерым дөнья, кечкенә генә тормыш, уку яшенә җиткән баланың 10-11 ел буена бөртекләп белем туплый, үзе кебекләр арасында дуслар таба торган, беренче тапкыр гашыйк булган, ә укытучылар, бигрәк тә класс җитәкчеләре - көн дәвамында әти-әнине алыштырган, һәр бала өчен борчылып-кайгыртып торган изге урын.

Шәһәрнең 90 нчы гимназиясе директоры Гөлсинә Закирҗанова исә педагоглар исеменнән яшьләрне сәламләп һәм алар тормышындагы мөһим вакыйга белән котлады. "Сезнең алда озакка сузылачак юл башланырга тора, сез - юллар чатында. Юл сайлаганда туры юлны сайлагыз, авыр булса да, гамәлләрегездә бары тик дөреслекне генә үз итегез!" - дип теләде ул.

"Әйе, инде менә олы тормышка ишек ачар вакыт җитте. Барлыгы 6940тан артык укучы, чыгарылыш имтиханнарын тапшыргач, мөстәкыйль юлга аяк басачак. Ун ел буена сез республика, ил күләмендә олимпиадаларда, төрле ярышларда җиңү яулап, безгә зур шатлыклар китердегез. Шуның өчен укытучыларга, ата-аналарга шундый әйбәт яшьләр тәрбияләгән һәм ныклы белем биргән өчен, укучыларга ышанычны аклаган өчен олы рәхмәт белдерәм, - дип сүз башлады Казан шәһәре мэры Илсур Метшин әлеге бәйрәмдә. - Казан яшьләре, сез иң чибәрләре, иң булганнары! Тырышыгыз, мөмкинлекләрегез зур - алда зур тормыш, һәм аның ямьле, уңышлы үтүе сездән тора. Парталардан сез укытучылар, дусларыгыз мәхәббәтен үзегез белән алып китәсез, иң ныклысы - мәктәп елларында туган дуслык, аны саклагыз, ел саен классларыгыз һәм укытучылар белән очрашырга сүз куешыгыз", - дип киңәш итте ул.

Соңыннан мэр җилкәсенә кунаклап алган 122 нче мәктәпнең 1 нче класс укучысы Алисә Варфоломеева Казан мәктәпләрен тәмамлаучылар өчен соңгы кыңгырауны чылтыратты. Сәнгать номерлары белән үрелеп барган бәйрәмне "Казан егетләре" төркеме үзенең җырлары белән дәвам иттерде.