М.Сафиуллин Бөтендөнья банкы вәкилләре белән очраша

26 майда Федерация Советында "2020 елга кадәр Россиянең озак вакытлы социаль-икътисади үсеше Концепциясе" нигезләмәләрен гамәлгә ашыруны законнар белән тәэмин итү турында зур сөйләшү узачак. Анда, аерым алганда, илкүләм инновация системасын төзү, федераль һәм төбәк дәрәҗәсендә аның механизмнарын һәм үсеш инструментларын формалаштыру, инновацияле икътисад өчен кадрлар әзерләү хакында сүз барачак. Фикер алышуларда Федерация Советы, федераль һәм төбәк хакимияте органнары, дәүләт корпорацияләре, эшлекле даирә вәкилләре, илнең танылган галимнәренең катнашуы көтелә. Бу тыңлауларда ТР икътисад министры Марат Сафиуллин да катнашачак, дип хәбәр итә министрлыкның матбугат хезмәте.

Аңа кадәр Мәскәүдә Татарстан министрының Бөтендөнья банкы вәкилләре белән очрашуы планлаштырылган. Аның барышында Татарстанда инновацияле эшчәнлек буенча тикшеренүләр алып бару мөмкинлекләре хакында сөйләшү узачак. Әлеге халыкара оешманың Татарстанга бу чираттагы эшлекле тәкъдиме. Банк инновацияле эшчәнлек һәм стратегик тәкъдимнәр эшләү өлкәләрендә гомуми төбәк сәясәтен формалаштыруда консультация хезмәтләре тәкъдим итә.

Билгеле булганча, республикада инновациянең үсеш перспективалары, бүгенге хәле, проблемалары турындагы мәгълүмат ТР Икътисад министрлыгы тарафыннан эшләнгән ике документта- 2008-2010 елларга Инновацияле меморандумда һәм Инновацияле эшчәнлек йомгаклары хакындагы дәүләт докладында урын алган. Меморандумда инновацияле эшчәнлекне дәүләт тарафыннан җайга салу системасының макроикътисади ориентирлары күрсәтелә. Аның нигезендә, Татарстанда инновацияле эшчәнлек нәтиҗәләре экспортның гомуми күләмендә югары технологияле продукциянең өлеше белән билгеләнә. Дәүләт доклады исә ел нәтиҗәләре буенча Хөкүмәткә җентекле хисап итеп әзерләнә. Ул инновацион эшчәнлекнең макроикътисади күрсәткечләрен, федераль, республика программаларын эшләү, гамәлгә ашыру йомгакларын, технопарк структурасы эшчәнлегендәге төп нәтиҗәләрне үз эченә ала.

Татарстанда эшләнгән шушы документларны тикшереп, Бөтендөнья банкы экспертлары конкрет чаралар программасын эшләп, республика инновация сәясәтендәге өстенлекле чараларны билгели ала.