Икътисади кризиска карамастан, Казанда балаларның җәйге ялы программасы тулысынча үтәләчәк

Быел Казан мәктәп һәм гимназияләре укучыларының җәйге ялын оештыру мәсьәләләре буенча мэриянең "дүшәмбе киңәшмәсе"ндә чыгыш ясаган Башкарма комитет җитәкчесенең социаль мәсьәләләр буенча урынбасары Зөһрә Нигъмәтуллина түбәндәгеләрне хәбәр итте.

Казан шәһәре балаларын быел шәһәрдән читтәге 39 стационар лагерь кабул итә алачак һәм, мэр Илсур Метшин сүзләренчә, лагерьларның берсе дә ябылмаячак. З.Нигъмәтуллина биргән мәгълүматларга караганда, шушы лагерьларның 14е шәһәр карамагында булса, 9ы - шәһәр предприятиеләренеке, тагын 9ы - төрле министрлыкларныкы, калганнары - югары уку йортларыныкы. Муниципаль лагерьларда исә барлыгы 8,4 меңнән артык бала ял итә, сәламәтлеген ныгыта алачак.

Стационар лагерьда 1 смена, ягъни 18 көн ял итүе 7,6-9,9 мең сум тәшкил итәчәк, профильле сменада - 7,4-9,5 мең сум, ә ата-анадан нибары 1-1,7 мең сум гына түләтеләчәк. Лагерьларда эшләүчеләргә исә быел 5,5-9 мең сум хезмәт хакы түләнелә, шулай ук төп эш урынында да хезмәт хакы сакланып кала.

Моннан тыш, Казанда 152 мәктәп яны лагере эшләячәк һәм аларда 15,3 меңнән артык бала ял итә алачак. Юллама бәясе 1 сменага 1,8-2,2 мең сум, шуңа өстәп, балаларны мәдәни чараларга алып бару өчен ата-ана 260 сум түләргә тиеш. Җәйге каникуллар вакытында шәһәрдә 49 яшүсмерләр клубы эшләячәк, шуларның 40ы кичке сәгатьләрдә дә.

Утырышка рәислек иткән мэр Илсур Метшин: "Икътисади кризиска карамастан, Казанда балаларның җәйге ялы программасы тулысынча үтәләчәк", - дип ышандыра. Узган елны җәйге лагерьда 1 баланың гомере өзелүен искәртеп, шәһәр башлыгы шушы эштә җаваплы затларга балаларның куркынычсызлыгы һәм янә андый хәл кабатланмасын өчен нинди өстәмә чаралар күрелүе хакында хисап әзерләргә кушты.