Төмәндә милли моңнар яңгырый

"Язгы моңнар" дип аталган концертны Милли мәдәниятләр йортының яшь белгече Гөлфия Хәлитова җитәкчелегендәге татар бүлеге әзерләп үткәрде. Концерт программасы көтелгәннән дә югарырак дәрәҗәдә булып, тамашачыларның ялкынлы алкышларына, олы рәхмәтенә лаек булды. Концерт һәвәскәр шагыйрә Клара Кучковская җитәкчелегендәге себер татарлары фольклор җыр ансамбле чыгышы белән башланып китте.

Төмән җиренең иң популяр җырчылары - Милли мәдәниятләр йорты каршындагы татар бүлеге хезмәткәре, Төмән мәдәният һәм сәнгать академиясендә читтән торып белем алучы, күптән танылган җырчы Розалия Бакиева, Ялутор районының Аслана мәдәният йорты директоры, үз вакытында Казан мәдәният һәм сәнгать институтын тәмамлап кайткан, гаҗәеп көчле, моңлы, матур тавышлы Илҗан Хөснетдинов, табигый таланты ташып торган Чулпан Акъярлылар яңа җырлары белән сөендерделәр төмәнлеләрне. Аларның татар җырларын башкару осталыклары профессиональ дәрәҗәгә күтәрелүен күрсәтте әлеге концерттагы чыгышлары.

"Әхтәмлеләр" Халык җыр ансамбле җитәкчесе буларак танылган Әхтәм Назыйров бу концертта татар бүлеге каршында яңа оештырып аякка бастырып килгән, яшьләрдән генә торган "Нур" җыр ансамблен беренче мәртәбә сәхнәгә чыгарды, һәм аны тамашачылар бик җылы кабул иттеләр. "Аккошлар" биюе белән татар биюен башкарган Полина Чералева белән Марат Ханов бу программаның йөзек кашы булып балкып уздылар сәхнәдән. Алар профессиональ әзерлекле биючеләр, әмма кайда әзерлек алуларын, кайсы ансамбльдә биюләрен әлегә сер итеп калдырдылар, татарлар алдына башлап кына чыгулары иде.

Домрада Анастасия Ярчева белән баянда Лилия Баширова башкарган татар халык көйләреннән тезмә үзе бер көтелмәгән бүләк булды төмәнлеләр өчен. Төмән сәнгать көллиятен тәмамлаган бу яшь музыкантлар үз кулларындагы музыка коралларын татар моңының барлык нечкәлекләрен, нәфислеген ачып яңгырата алулары белән сокландырдылар.

Себерлеләрдән "Оркестр - кеше" исемен алган халык музыка кораллары остасы, Саба егете, Төмәнне икенче ватаны итеп кабул иткән Әбүзәр Миңлебаевның кул бармаклары арасыннан баяннан башлап уч төбенә генә сыярлык гармуннарында, курай-кубызларда сызылып чыккан милли моңнарыбыз аның сәхнәгә һәр чыгышында яңача яңгырый кебек тоела. Бу концертка да яңа моңнар өстәде Әбүзәр.

Концертны мәгънәле шигъри бизәкләргә төреп, Татар радиосы дикторы Рузилә Исмәгыйлова алып барды. Рус кызлары Анастасия белән Полинаның күңелләре белән тартылып милли сәнгатебезгә килеп керүләре дә концерт программасына үзенчәлекле җылылык, өмет чаткысы өстәде. Татар сәнгатен үстерү өчен, бу эшне системага салып алып бару өчен шартлар булмауга да карамастан, Төмән җирендә иҗат чишмәләренең исәнлеген, аның талантларга бай булуын, аны башка милләт кешеләренең дә яратуын күрсәтте бу концерт.

Тамашачылар күңелендә ягымлы язгы моңнар кайтавазы калдырып, матур җыр-моң бәйрәме булып үтте "Язгы моңнар" дип аталган концерт.

"Язгы моңнар" концертын оештырып үткәрү өчен иганәчелек ярдәме "Ак барс" банкысының Төмән филиалыннан булды.