Казанның 1 номерлы татар гимназиясендә “1 укучы: 1 компьютер” уникаль проектын тәкъдир иттеләр

Казанның 1 номерлы татар гимназиясе “ПервоКлассная акция” проектында җиңүгә иреште һәм бүләккә “Intel” компаниясеннән мобиль класс алды.

“AquaCart” мобиль классы укучылар өчен 25 нетбуктан, укытучы ноутбогыннан һәм локаль челтәргә үткәргечсез тоташу ноктасыннан тора. Шулай ук Интернетка чыгу мөмкинлеге бар. Мобиль класс мәктәпнең теләсә кайсы почмагына күчерелә, чөнки үткәргечләр кулланылмый һәм берничә минутта эшкә әзер була. Мобиль классның җиһазлары арба-сейфта җиңел күчерелә. “Intel” компаниясе проектында җиңүче мәктәпне билгеләү өчен конкурс “Һәр укучының үз компьютеры” яки “1 укучы: 1 компьютер” компаниясе концепциясе кысаларында үткәрелде. Шәһәрлеләр тавыш бирү юлы белән җиңүче мәктәпне сайлап алды.

Бүген журналистларга беренче сыйныф укучыларының ике айда яңа җиһазны үзләштерүләрен күрсәттеләр. Гаммәви мәгълүмат чаралары вәкилләре өчен 1 “б” сыйныфында интерактив җиһазлар һәм нетбуклар файдаланып ачык дәрес оештырылды. Аерым алганда, балалар текстта төшерелеп калдырылган басымсыз сузык хәрефләрне куярга тиеш иде. Укытучы биремне үтәгән вакытта үз компьютерыннан һәр укучының эшен күзәтеп бара алды. Шулай итеп, укытучыга мондый система үз эш урынында утырган килешә укучыларның эшен күзәтә һәм биремнәрне үтәү процессын контрольдә тота ала.

ТР мәгариф һәм фән министрның урынбасары Андрей Поминов ышандыруынча, барлык мәктәп җитәкчеләре дә укучыларның компьютер алдында күпме сәгать утырырга тиешлеге буенча куелган таләпләрне үти.

“Intel” компаниясенең мәгариф өлкәсендә корпоратив бизнесны үстерү директоры Юлия Гонтарь Татарстанның “Һәр укучының үз компьютеры” концепциясе апробацияләнгән тугызынчы төбәк булуын белдерде. Моннан тыш корпорация укытучыларны яңа җиһазда эшләргә дә өйрәтә. Компания вәкиле сүзләренчә, “Intel” программасының максаты - Интернеттан файдаланучылар санын бөтен дөньяда тагын 1 миллиард кешегә арттыру, шулай ук уку процессында 10 миллион укытучыны компьютер технологияләрен файдаланырга өйрәтү, алар үз чиратларында тагын миллиард укучыга белем бирә ала.