Казандагы "Россия студентлар язы"- 17 ел эчендә узган иң яхшы фестиваль

17 еллык тарихы булган "Россия студентлар язы" фестиваленең быелгысы башкаларыннан кайсы ягы белән аерылып тора? Бүген журналистлар белән очрашуны фестивальне оештыручылар һәм жюри рәисләре шул сорауга җавап бирүдән башлады. Килгән кунакларны һәрвакыт матур итеп һәм тиешле дәрәҗәдә кабул итә белгән Татарстан, Казан бу юлы да сынатмады. Оештыручылар да, жюри да бертавыштан Казан фестиваленең югары кунакчыллыгын һәм киң күңеллелеген билгеләп үтте.

Россия яшьләр берлеге үзәк комитеты беренче секретаре Андрей Платонов белдергәнчә, "Студентлар язы" фестивален кабул итүче шәһәрләрнең үзләренә генә хас үзенчәлекләре була. Казанның төп үзенчәлекләре арасыннан ул ярышлар уздыру, яшәү, ял итү урыннарының бер-берсеннән бик якын, уңайлы урнашуын атады. Театр юнәлешендәге эшләргә бәя биргән жюри рәисе, РФ халык артисты Юрий Васильевның күңелен жюри әгъзаларына кабул итүче яктан бернинди басым булмау, объектив бәяләү, эшләү һәм студентларга яшәү өчен бик уңайлы шартлар тудырылу җәлеп иткән. Россиянең 68 төбәгеннән 1700 дән артык сәләтле егет һәм кызны 5 көн буе үзенә сыендырган Казанга "Россия студентлар язы" программасының башкарма дирекциясе директоры Анастасия Махнакова да бик рәхмәтле. Ул быелгы фестивальнең 17 ел эчендә узган иң яхшы фестиваль булуын ассызыклап, киләсе "Студентлар язын" кабул итүче шәһәргә Казандагы оештыру дәрәҗәсеннән түбән төшмәс өчен шактый эшләргә туры киләчәген искәртте.

2010 елда "Россия студентлар язы"н кабул итәчәк шәһәрнең исеме әле мәгълүм түгел. Аңа дәгъва итүче төбәкләр, билгеле булганча, конкурста проектлары белән катнашып сайлап алына. Анастасия Махнакова белдергәнчә, конкурс инде башланган һәм ул 15 сентябрьгә кадәр дәвам итәчәк. Казан шәһәре киләсе елгы фестивальне кабул итү өчен дә көрәшә ала. ТР Яшьләр эшләре, спорт һәм туризм министры урынбасары Андрей Кондратьев белдергәнчә, алдагы елларда фестивальне кабат кабул итү перспективасы бар. Хәзергә әле башкала 2013 елгы Универсиадага әзерләнүгә төп көчне куячак.

Матбугат очрашуы Казанны мактау белән генә чикләнмәде, билгеле. Жюри рәисләре үз юнәлешләрендә тәкъдим ителгән чыгышларның дәрәҗәсенә бәя биреп, үзләрен борчыган проблемаларга да тукталды. Юрий Васильевны, мәсәлән, театр юнәлешендә чыгыш ясаган студентлар, коллективларның жанрны ачуга әзерлек дәрәҗәсе канәгатьләндереп бетерә алмый. Аның сүзләренә караганда, оригиналь, кыю фикерле чыгышлар аз, күбесе кабатлана торган әйберләр. РФ халык артисты белдерүенчә, монда студентларны гына гаепләргә кирәкми. Бу, иң беренче чиратта, алар белән эшләүче педагоглар, режиссерлар кимчелеге. Әмма шул ук вакытта ул егетләр һәм кызлар чыгышындагы зур ихласлылыкка игътибарны юнәлтте. Жюри рәисе студентлар театрларына "Комеди Клаб" кебек шоуларның зур йогынтысы булуына борчылу белдерде. Шул сәбәпле, студентлар театрларының үз йөзе югала, йомшак пародия, зыялы, итагатьле юмор урынына, сәхнәгә "билдән түбән" юмор чыга. Остаз бу юнәлешләрне үстерү өчен төбәкләргә чыгып, мастер-класслар уздыру зарурлыгын искәртте. Бу җәһәттән Казандагы "Россия студентлар язы" фестивалендә беренче адымнар ясалган инде. Мондый иҗат остаханәләре киләсе фестивальләрдә даими урын алачак.