Казанның яшь архитекторлары Мэр Гранты өчен ярыша

Мэр Грантына игълан ителгән ачык конкурсның 3 нчесе быел 23 мартта башланып киткән иде. Казан шәһәренең проект-архитектура оешмаларында эшләр өчен югары сыйфатлы белгечләр туплау, әйбәт кадрлар формалаштыруны максат итеп оештырылган әлеге конкурста Казан дәүләт архитектура-төзелеш университеты студентлары һәм аспирантлары, шушы уку йортын тәмамлап чыкканнар катнаша ала, җиңүчеләргә дөньяның иң зур архитектура вузларында һәм әйдәп баручы компанияләрендә белем алу, стажировка үтү мөмкинлеге бирелә.

Конкурсның 6 сәгатьлек I сайлап алу туры кысаларында “стажировка” номинациясендә Казандагы Әхтәмов урамында ябык бассейн проекты эскизын ясау, “белем алу” номинациясендә күп аралыклы һәм күп функцияле спорт комплексын проектлау буенча конструкторлык тәкъдимнәре кертү таләп ителгән иде. II турда, конкурсантларның инглиз телен белү дәрәҗәсен ачыклау өчен, тест яздырылды. Нәтиҗәдә, III турга “стажировка” буенча 20 кеше, “белем алу” номинациясе буенча 5 кеше сайлап алынды. Казан мэриясеннән алынган мәгълүмат буенча, быел конкурста катнашып белем алу өчен 14 белгеч, стажировка узу хокукы өчен әлеге уку йорты факультетларының IV, V курс студентларыннан 55 кеше теркәлгән булган.

15 май көнне Казан Ратушасында Мэр Гранты конкурсының соңгы этабы булды. Финалга чыккан 25 конкурсантны Казан мэры Илсур Метшин рәислегендәге комиссия (анда Казан дәүләт архитектура-төзелеш университеты ректоры һәм деканы, шәһәр Башкарма комитеты вәкилләре керә) кабул итеп, һәрберсе белән аерым-аерым әңгәмәләште, алдагы этапларда башкарган эш нәтиҗәләре белән якыннан танышты, әһәмиятле саналган эшләренең сызымнарын, иллюстрацияле материалларын карап, өстәмә сораулар бирде.

Җиңүчеләрне бүләкләү тантанасы исә 20 майга билгеләнгән.