Казанда БДБ илләре миграция органнары җитәкчеләре Советының утырышы эшли башлады

Бүген Казанда Бәйсез дәүләтләр бердәмлеге илләре миграция органнары җитәкчеләре Советының законсыз миграциягә каршы көрәш мәсьәләләренә багышланган утырышы эшли башлады. "Корстон" комплексында узучы бу масштаблы чарада Россия Федераль миграция хезмәте директоры, генерал-милиция полковнигы Константин Ромодановский, БДБ Башкарма комитеты, РФ, Әзербәйҗан, Әрмәнстан, Беларусь, Украина, Үзбәкстан, Казахстан, Кыргызстан, Таҗикстан делегацияләре вәкилләре катнаша. Утырышны ачу тантанасы ТР Премьер-министры Рөстәм Миңнеханов, Эчке эшләр министры Әсгать Сәфәров катнашында узды.

Казан БДБ илләре миграция органнары җитәкчеләрен кабул итүче Россиянең икенче төбәге. Моңа кадәр Совет утырышларының берсе Санкт-Петербургта узган булган. Законсыз миграциягә каршы көрәш өлкәсендә хезмәттәшлек, килештерелгән миграция сәясәте үткәрү өчен шартлар тудыру - бу утырышта фикер алышуга чыгарылган төп темалар әнә шулар. Константин Ромодановский журналистлар белән әңгәмә барышында белдергәнчә, бу җыен компетентлы органнар хезмәттәшлегенең нәтиҗәлелеген күтәрүгә, миграцион вәзгыятьнең кайбер тискәре йогынтысын киметүгә, хезмәт мигрантларының социаль-икътисади хәлен һәм хокукларын тиешенчә тәэмин итүгә ярдәм чарасы буларак уйланылган.

Аның сүзләренә караганда, узган ел закон бозган өчен 20 мең мигрант Россия территориясеннән куып чыгарылган. Быел бу сан артуга бара. Узган 3 ай эчендә генә дә илдән 10 мең мигрант куылган. "Якын чит илләрдән эшче куллар Россиягә агыла тора. Моңа БДБ илләренә караганда Россиянең икътисады көчлерәк булу тәэсир итә. Хезмәт миграциясе эшче көчләр белән тәэмин итә. Куып чыгарылучылар мөмкин кадәр аз булсын өчен, закон нигезендә эшләүче мигрантлар санының күп булуы кирәк. Бу мәсьәләләр Россиядә эшче кулларны яклау мәнфәгатен күздә тотып, катгый рәвештә җайга салынырга тиеш. Бүген илдә миграция белән бәйле вәзгыять катгый контрольдә тотыла. Законсыз нигездә эшче кулларны файдалануга юл куймаска тырышабыз. Шулай да әле вәзгыятьне гади димәс идем", -ди Федераль миграция хезмәте башлыгы.

Законсыз миграциягә каршы көрәштә Россиянең БДБ илләре белән хезмәттәшлеге ике яклы килешүләр нигезендә алып барыла. Шулай ук Хезмәт ияләренең хокукларын яклау турындагы Конвенция эшләнгән. Константин Ромодановский хәбәр иткәнчә, хәзер мигрантларның оешкан төстә күчешен тәэмин итү системасын төзү буенча документ эшләнә. Ул тиешле әзерлеге, квалификациясе булган якын чит ил гражданнарының үз иленнән китеп, Россиягә конкрет эш бирүчегә, конкрет эш урынына килүен күздә тота. Бер яктан, Россиягә сорау булган эшче куллар гына килә, икенчедән, мигрантларның хокуклары ышанычлы тәэмин ителәчәк.

Бүген утырыш тәмамланганнан соң, көннең икенче яртысында Россия Федераль миграция хезмәте директоры, генерал-милиция полковнигы Константин Ромодановский белән ТР Эчке эшләр министры урынбасары вазифаларын башкаручы Евгений Дәүләтшин, Федераль миграция хезмәтенең ТР буенча идарәсе җитәкчесе вазифаларын башкаручы Сергей Чепуштанов Яшел Үзәндә Федераль миграция хезмәте Татарстан идарәсенең биредәге бүлегенең яңартылган бинасын ачу тантанасында катнашачак.

Иртәгә "Корстон"да ЕврАзЭС ның Интеграция комитеты каршындагы Миграция сәясәте советының һәм Коллектив куркынычсызлык килешүе оешмасына кергән илләрнең компетентлы органнары җитәкчеләре координация советының законсыз миграциягә каршы көрәшкә багышланган уртак утырышы планлаштырылган. Шул ук көнне БДБ делегациясе вәкилләре ЕврАзЭС ның Интеграция комитеты каршындагы Миграция сәясәте советының утырышын да уздырачак.