М.Шәймиев: "Хәйриячелек күпләр өчен яшәү кагыйдәсенә әйләнә бара"

13 май көнне Кремльдә ТР Президенты Минтимер Шәймиев рәиселегендә Хәйрия эшчәнлеге мәсьәләләре буенча республика советының чираттагы утырышы узды. ТР Премьер-министр урынбасары - мәдәният министры Зилә Вәлиева, Дәүләт Советы рәисе урынбасары Александр Гусев, "Беренче канал" ААҖ генераль директоры урынбасары Олег Вольнов, әлеге каналда эфирга чыгучы "Сәламәтлек" ("Здоровье") тапшыруының авторы һәм алып баручысы Елена Малышева, министрлык-ведомстволар, предприятие-оешмалар җитәкчеләре, хәйриячеләр катнашында узган бүгенге утырыш тулысы белән балалар мәнфәгатьләре өчен хәйриячелеккә багышланды.

2007 ел Татарстанда Хәйрия елы дип игълан ителгән иде. Аннан соң килгән 2008 - Гаилә елында, быелгы Спорт һәм сәламәт яшәү елында да хәйрия традицияләре, аның белән бәйле саваплы гамәлләр дәвам итеп, "алтын җеп" булып сузылып бара. Бүгенге утырышны ачып җибәргән Президент Минтимер Шәймиев, кереш чыгышында республикада алып барылучы хәйриячелек эшләренә тукталып узды. "Берничә ел элек бу күркәм традицияне яңадан торгызу теләге белән күп нәрсәгә ирештек. Күпләребез өчен хәйриячелек яшәү нормасына әйләнеп бара. Бу изге эшне халык чын күңелдән, күңел өчен дип башкара", -дип билгеләп узды республика башлыгы.

Элегрәк тә, ярдәм итәргә теләк белдерүчеләр күп булган. Ә бу эшне системалы итеп оештырганнан соң, ярдәм итүчеләр тагын да арткан, ярдәм итү формалары төрлеләнгән. Президент ассызыклаганча, монда шәһәр-районнар тарафыннан ярдәмгә мохтаҗ физик һәм юридик затларның исемлеге тәгаенләнү, аларның адреслары төгәл күрсәтелеп бирелү зур роль уйнаган. Ярдәм кулы сузучыларның барысын да исәпкә алып бетереп тә булмый. Исемнәрен әйтмичә генә изге гамәлләр кылучылар да шактый республикада.

Президент республикакүләм акцияләр уздыруның бу эштә мөһим урын алып торуын искәртте. Шундый акцияләр нәтиҗәсендә барлык мохтаҗ инвалидлар коляскалар, ишетү аппаратлары белән тәэмин ителгән. Узган уку елында беренче сыйныфка баручы социаль яклауга мохтаҗ балаларны мәктәпкә кирәк-яраклар белән тәэмин итү буенча зур эш башкарылган. "Без хәзер туктала алмыйбыз, мондый ярдәм чаралары алга таба да дәвам итәчәк. Бурыч - тормышның барлык якларын колачлап, алга таба җәмгыятьнең нәрсәгә мохтаҗ булын ачыклау", -ди республика башлыгы.

Минтимер Шәймиев быел Балаларны халыкара яклау көненә туры китереп Татарстан белән масштаблы хәйрия акциясенә алынган "Беренче канал" ААҖ җитәкчелегенә рәхмәтен белдерде. Ул белдергәнчә, дөньяда балаларны яклау белән бәйле проблема күп яклы. Шуңа күрә аларны чишү өчен күп формалар кирәк. "Төп максат- баланы кеше итү. Моңа ирешү өчен без бу юлда нинди киртәләр булуын ачыклап, аларны чишү юлларын белергә тиешбез. Балаларның язмышлары бер-берләреннән аерыла. Глобальләшү шартларында аларга игътибар кимергә тиеш түгел. Аларга ярдәм итү өчен өлкәннәрдән зирәклек таләп ителә", -ди Президент.

Хәйрия эшчәнлеге мәсьәләләре буенча республика советы инициативасы белән апрельдә "Без булдырабыз!" дигән республика хәйрия акциясенә старт бирелгән иде. Әлеге акциядә катнашырга теләүчеләр 5075 кыска номерына ДЕТИ сүзе белән СМС юлларга тиеш. Хәбәрнең бәясе 30 сум. Моннан җыелган акчалар балалар дәвалау, мәгариф, социаль учреждениеләренә, инвалид-балаларга адреслы ярдәм күрсәтү өчен тотылачак. Бүгенге Хәйрия эшләре мәсьәләләре буенча республика советы утырышы ахырында игълан ителгәнчә, тавыш бирүчеләр саны инде 254 меңгә якынлаша иде. Утырышта катнашучылар да моңа үз өлешләрен кертте.