“РОСНАНОТЕХ” делегациясенә Татарстанның инновация проектлары тәкъдим ителде

27 март көнне ТР Министлар Кабинетында ТР проектларын һәм программаларын гамәлгә ашыруда РФ Дәүләт хакимияте органнары белән хезмәттәшлек буенча республика ведомствоара комиссиясе белән “Россия нанотехнологияләр корпорациясе” һәм Татарстан арасында нанотехнологияләрне, наноиндустрияне үстерү өлкәсендә хезмәттәшлек Килешүен гамәлгә ашыру буенча Координация Советының уртак утырышы узды. Аның эшендә ТР Премьер-министры Рөстәм Миңнеханов, генераль директор Анатолий Чубайс җитәкчелегендәге “РОСНАНОТЕХ” делегациясе, вузлар, предприятиеләр, фәнни институтлар җитәкчеләре һ.б. катнашты.

Утырышта “Россия нанотехнологияләр корпорациясе” җитәкчесенә нефть химиясе, машина төзелеше өлкәләрендә Татарстанда эшләнгән уннарча инновация проекты тәкъдим ителде. Яңа буын аккумуляторлар җитештерү - шуларның берсе. Казан дәүләт университеты галимнәренең бу хезмәт “җимешен”утырышта ТР мәгариф һәм фән министры Альберт Гыйльметдинов презентацияләде. Аның аңлатуынча, бу уникаль аккуумуляторның конкурентлык өстенлеге - җиңел, йөк автомобильләре, тракторлар өчен бердәй файдаланыла алуында. Ул шулай ук авиа- һәм суднолар төзелеше тармагында да кулланыла ала. Нанотехнологияләр куллану ярдәмендә аккумуляторның ток сыйдырышлылыгы 1,5 тапкырга арткан. Бу нанопродуктның чыдамлылыгы да югары. Ул 40 градус салкында да тоткарлыксыз эшләргә сәләтле. Әлеге инновация проектын гамәлгә ашыруга чама белән 2 млрд.сумлык инвестицияләр кирәк. Татарстан шуның 146 млн. сумын үзе инвестицияләргә әзер. Утырышта шулай ук ятмаларның нефть бирү сәләтен күтәрүгә юнәлдерелгән берничә проект тәкъдим ителде. Алар Россиядә төп нефть ятмаларының искерүен күздә тотып эшләнгән.

Анатолий Чубайс утырыш соңында, журналистлар белән әңгәмәдә белдергәнчә, Татарстан Россиядә эре нанотехнологик кластер төзү өчен база төбәге булуга дәгъва итүче төп төбәк. Бүген биредә нефть эшкәртүдә, авиа, автомобиль төзелешендә, белем бирү, фәнни компонент буенча мая тупланган. “Бүген танышкан бу проектлар нанотехнологияләр өлкәсендә башлап куйган эш кенә түгел, ә конкрет хезмәтләр. Проектларның зур өлеше “РОСНАНОТЕХ” ярдәмен алырга лаеклы һәм аны алачак та”,- дип белдерде генераль директор.

“РОСНАНОТЕХ”тан финас ярдәме алуга экспертиза узган һәм фәнни-техник, бизнес таләпләренә җавап биргәнϰ проектлар өметләнә ала. Анатолий Чубайс белдергәнчә, бүген корпорацияциянең финанс мөмкинлекләре алынган проектларның финанслау күләменнән күбрәк. Шуңа күрә корпорация төбәкләрдән күбрәк инновация проектлары килүен көтә. Билгеле булганча, Татарстан “РОСНАНОТЕХ”ка 17 проект буенча заявка биргән. Бүгенге көндә шуның берсе буенча тиешле экспертиза, теркәлү үтеп, җитештерүгә керешергә рөхсәт алынган. Ул -“Данафлекс” җәмгыятенең нанокомпозит материаллар нигезендә пленкалар җитештерүгә кагылышлы проекты. Бүген “Россия нанотехнологияләр корпорациясе” әлеге предприятиедә булачак.