Рөстәм Миңнеханов фән һәм техника өлкәсендә РФ Хөкүмәте премиясе лауреаты булды

ТР Премьер–министры Рөстәм Миңнеханов фән һәм техника өлкәсендә РФ Хөкүмәте премиясе лауреаты булды. РФ Хөкүмәтенең 2009 елның 10 мартында чыккан тиешле карары агымдагы елның 20 мартында “Российская газета”да дөнья күрде.

Фән һәм техника өлкәсендә РФ Хөкүмәте премияләрен тапшыру Ведомствоара советы тәкъдимнәрен караганнан соң, РФ Хөкүмәте икътисад фәннәре докторы, ТР Премьер–министры Рөстәм Миңнехановка 2008 ел өчен фән һәм техника өлкәсендәге премияне һәм “Фән һәм техника өлкәсендә РФ Хөкүмәте премиясе лауреаты” дигән исемне бирергә карар кылды.

Лауреатлар арасында шулай ук техник фәннәр докторы, профессор, А.Н.Туполев исемендәге Казан дәүләт техник университеты президенты Геннадий Дегтярев, икътисад фәннәре кандидаты, профессор, “КАМАЗ” ачык акционерлык җәмгыяте генераль директоры Сергей Когогин, техник фәннәр докторы, профессор, ТР Министрлар кабинеты каршындагы Энергия саклау технологияләре үзәге директоры Евгений Мартынов, ТР сәнәгать һәм сәүдә министры урынбасары Фәрит Туктаров бар. Премия Татарстан Республикасы энергия саклау һәм энергия ресурсларының нәтиҗәлелеге комплекслы төбәк программасын эшләгән һәм гамәлгә ашырган өчен тапшырылды.