Индустриаль икътисади мәйданчыклар ТР эшкуарлык үсеше процессына теләктәшлек итәчәк

24 мартта ТР Министрлар Кабинетында булган эшлекле киңәшмәдә Татарстан Республикасы территориясендә кече һәм урта эшкуарлык өчен индустриаль икътисади мәйданчыклар булдыру, республика дәрәҗәсендә салым ташламалары тәкъдим итү мөмкинлекләре буенча фикер алыштылар. Киңәшмәне ТР Премьер-министры Рөстәм Миңнеханов үткәрде, дип хәбәр итә Министрлар Кабинетының матбугат хезмәте.

Мондый мәйданчыклар булдыру идеясен ТР Кече һәм урта эшкуарлык буенча комитет тәкъдим иткән. Индустриаль икътисади мәйданчыклар заманча икътисади шартларда республикада эшкуарлык үстерү процессына теләктәшлек итәр, яңа производстволар ачарга һәм яңа эш урыннары белән тәэмин итәргә ярдәм итәр, дип ниятләнә. ТР Кече һәм урта эшкуарлык буенча комитет җитәкчесе Тимур Шаһивәлиев киңәшмәдә чыгыш ясаганда мондый индустриаль мәйданчыклар эшче куллар һәм энергетика егәрлекләре кирәгеннән артык булган районнарда оештырылырга мөмкин, дип белдерде.

ТР Премьер-министры Рөстәм Миңнеханов компания-резидентларга республика дәрәҗәсендә салым ташламалары тәкъдим итү мөмкин икътисади мәйданчыклар ачу федераль законга каршы килергә тиеш түгел, дип билгеләп үтте. Моннан тыш, Рөстәм Миңнеханов мондый индустриаль мәйданчыкларда үз производстволарын урнаштырачак кече һәм урта эшкуарлык субъектларына инфраструктураны тоташтыру буенча ташламалар ясау мөмкинлеген карарга тәкъдим итте.

Аның сүзләренчә, ташламалар ясау мәсьәләсе юридик яктан җитди тикшерү, салым салу өлкәсе белгечләреннән консультация алуны таләп итә.