25 мартта – Россия Мәдәният хезмәткәрләре көне

25 мартта Россиядә Мәдәният хезмәткәрләре көне билгеләп үтелә. Әлеге уңайдан ТР Премьер–министры урынбасары – мәдәният министры Зилә Вәлиева Татарстан халкына мөрәҗәгать итте.

“2008 елның 25 мартыннан башлап Россия Федерациясендә мәгърифәтчеләр һәм иҗатчылар, мәдәни кыйммәтләрне саклаучылар, театр һәм концерт оешмалары, шәһәр һәм авыл мәдәният йортлары, клубларда эшләүчеләр, үзешчән сәнгать энтузиастларын берләштерүче һөнәри бәйрәм – Мәдәният хезмәткәрләре көне билгеләп үтелә. Әлеге бәйрәмнең әһәмияте мәдәният хезмәткәрләренең югары миссиясе белән билгеләнә. Аларның тәҗрибәсе, белеме һәм таланты рухи традицияләрнең, Татарстан халыкларының милли үзенчәлекләрен саклау һәм үстерүнең буыннан–буынга күчүен тәэмин итә.

Республикабыз мәдәният һәм сәнгать эшлеклеләренең егерме меңлек отряды – фидакарь һәм талантлы шәхесләр, иҗади башлангыч инициаторлары бергәлеге. Татарстанның мәдәният тормышы гаять бай һәм күп төрле.

Республикада федераль һәм Халыкара дәрәҗәдә үткәрелүче чараларның саны елдан–ел арта бара. Болар – Шаляпин, Нуриев опера һәм балет сәнгате фестивальләре, “Алтын мөнбәр” мөселман киносы фестивале, безнең музейлар тарафыннан Эрмитаж, Лувр, Британия музейлары белән берлектә үткәрелүче уникаль күргәзмәләр. Безнең театрлар Татарстан һәм аның башкаласының визит карточкалары санала. Республика халкына китапханә, музей, мәдәният йортлары тарафыннан күрсәтелә торган хезмәтләрнең спектры даими киңәя бара.

Безнең иҗат коллективлары, дәүләт, муниципаль һәм башка мәдәният оешмалары гомумроссия һәм төбәкара программаларны гамәлгә ашыруда актив катнаша. Без музыкантлар, сәхнә осталары, яшьләр иҗаты һәм үзешчән сәнгатьтә катнашучы балаларның җиңүләре белән горурланабыз.

Болар барысы да мәдәният хезмәткәрләренең бар тырышлыгын куеп, күңелләрен биреп алып бара торган эшчәнлеге нәтиҗәсе. Безнең республика җитәкчелеге дә мәдәният, аның проблемалары һәм бу өлкәдә хезмәт куючыларга зур игътибар бирә.

Соңгы елларда мәдәният өлкәсе зур үзгәрешләр кичерә. Мәдәни-тамаша учреждениеләре белән идарә итү системасы реформалаштырыла. Талантлы һәм инициативалы мәдәният хезмәткәрләре алдында иҗади проектларны гамәлгә ашыру, шулай ук бизнес-бергәлек белән актив һәм тыгыз элемтәдә эшләү мөмкинлекләре ачыла.

Дөньядагы финанс кризисы җәмгыять тормышына һәм халыкның кәефенә йогынты ясамыйча калмый. Бүген мәдәният хезмәткәрләренең җәмгыятьне сәламәт әхлаклы итеп саклауда роле зур. Республика бу мөһим миссияне үтәүдә аларның таланты һәм иҗади энергиясенә ышанырга хокуклы. Безнең мәдәният эшлекләренең сынауларны җиңәчәгенә һәм Татарстанның мәдәни традицияләрен арттыра алачакларына ышанам. Кадерле дуслар!

Татарстанның барлык мәдәни хезмәткәрләрен һөнәри бәйрәмнәре белән котлыйм! Сезгә сәламәтлек, бәхет, иминлек һәм иҗади планнарыгыз гамәлгә ашуын телим”, - диелә котлауда.