Р.Моратов социаль әһәмияткә ия тауарларның бәясен һәм сыйфатын контрольдә тотарга ниятли

Татарстан Республикасы территориясендә тәкъдим ителгән сәүдә челтәр компанияләренең җирле тауар җитештерүчеләр белән үзара мөнәсәбәтенә бәйле мәсьәләләр хакында атна саен фикер алышыначак. 25 мартта ТР Премьер–министрының беренче урынбасары Равил Моратов ТР Министрлар Кабинетында үткәргән киңәшмә нәтиҗәләре буенча әнә шундый карар кабул ителде.

Татарстанның ваклап сәүдә итү челтәрләрендә социаль әһәмияткә ия тауарларның сыйфаты һәм аларга бәяләр билгеләү мәсьәләләре киңәшмәнең төп темасы булды.

ТР сәнәгать һәм сәүдә министры урынбасары Олег Власов хәбәр иткәнчә, 2009 елның беренче ике аенда республикада ваклап сәүдә итү әйләнеше 59 миллиард сум тәшкил иткән, 2008 елның гыйнвар–февраль айлары белән чагыштырганда үсеш нибары 3 процент булган. Ваклап сәүдә итү өчен бу тискәре нәтиҗә, диде Олег Власов. Сәүдә компанияләре мәгълүматларына караганда, сатып алучыларның саны, сатуларның күләме кимү тенденциясе күзәтелгән. Республикада “Рамстор”, “Гроссмарт” сәүдә челтәрләре үз эшчәнлеген туктаткан.

Шуның белән бергә республикада бәяләрнең нигезсез рәвештә күтәрелүенә юл куймас өчен барысы да эшләнә. Бу аеруча “социаль әһәмияткә ия төркемгә” (сөт һәм сөт продуктлары, икмәк һәм икмәк–күмәч әйберләре, ярмаларның кайбер төрләре һәм башкалар) керүче тауарларга кагыла.

Республика тауар җитештерүчеләре һәм челтәр компанияләренең үзара мөнәсәбәтен җайга салу өчен җирле тауар җитештерүчеләр продукциясенең ваклап сату челтәренә ирекле үтеп керүен тәэмин итү буенча адымнар ясалган.

Искәртеп узабыз, бүгенге көндә Татарстанның агросәнәгать комплексы халыкны төп тауарлар – икмәк һәм икмәк–күмәч әйберләре, сөт һәм сөт продуктлары, яшелчә, шикәр белән тулысынча тәэмин итә. Республика арыш һәм арыш–бодай икмәгенә бәяләр рейтингында Идел буе федераль округының 14 төбәге арасында – 14, бодай оныннан пешерелгән икмәккә – 5, сөткә бәяләр рейтингында 4нче урынны били. Татарстанда минималь азык–төлек җыелмасының бәясе (2009 елның февралендә – 1795,8 сум) Россиядә иң түбәне.

Равил Моратов социаль әһәмияткә ия төркемгә керүче тауарларга бәя кую мәсьәләләрендә катгый позиция алырга чакырды. Аның фикеренчә, ваклап сәүдә итү компанияләре республика кулланучыларын “бәя–сыйфат” стандартларына җавап бирүче продукция белән тәэмин итәргә тиеш.

Моннан тыш, Равил Моратов тиешле ведомстволарга (кулланучыларның хокукларын яклау һәм кеше иминлеге өлкәсендә күзәтчелек Федераль хезмәтенең ТР буенча идарәсе, Кулланучыларның хокукларын яклау комитеты һәм башкалар) ваклап сәүдә итү челтәрләрендә продукциянең саклану шартларын, сыйфат сертификатлары булу–булмавын һәм башка шартларны контрольдә тотарга тәкъдим итте.

Равил Моратов тәкъдиме белән мондый киңәшмәләр атна саен үткәреләчәк, дип хәбәр итә ТР Министрлар Кабинетының матбугат хезмәте.