Узган ел “Татнефть” барлык бюджетларга 243 млрд. сумнан артык салым түләгән

Узган ел дәвамында “Татнефть” җәмгыяте тарафыннан ятмалардан 25 млн. 766 мең тонна “кара алтын” чыгарылган. Шуның 366 мең тоннасы планнан тыш табылган. 11,7 млн. тонна углеводород чималы катламнарның нефть бирү сәләтен күтәрү чараларын куллану ярдәмендә алынган. Ул узган ел чыгарылган нефтьнең 45 проценттан артыграгын тәшкил итә. Әлеге мәгълүматлар бүген “Татнефть” ААҖ Директорлар советының ТР Министрлар Кабинетында Премьер-министр Рөстәм Миңнеханов рәислегендә узган чираттагы утырышында яңгырады. Анда компаниянең 2008 елдагы финанс-хуҗалык эшчәнлегенә йомгак ясалды.

Министрлар Кабинетының матбугат хезмәте хәбәр итүенчә, узган ел компани тарафыннан табылган иярчен газ күләме 762 млн. куб. метр тәшкил иткән. Ягъни, 2007 елга караганда 3,2 процентка күбрәк. Узган ел дәвамында компания тарафыннан 328 нефть чыгару скважинасы файдалануга тапшырылган, алар ярдәмендә 382 мең тонна нефть чыгарылган. Шулай ук 2008 елда “Татнефть” республикадан читтәге территорияләрдә 19 скважина бораулаган. Эксплуатация һәм разведка бораулау эшләренә 7 млрд. сумлык инвестицияләр салынган. Финанс-хуҗалык эшчәнлеге нәтиҗәсендә “Татнефть” барлык дәрәҗәдәге бюджетларга 243 млрд. сумнан артык салым һәм җыемнар түләгән. Бу, 2007 ел күрсәткеченнән, якынча 40 процентка артыграк.

Директорлар советы утырышында шулай ук компаниянең 2009 елның гыйнвар, февраль айларына бюджеты үтәлеше тикшерелеп, апрель аена һәм икенче кварталга бюджеты расланган.