Казанда «Балага ярдәм ит» акциясе үткәрелде

27 мартта «Казан» милли мәдәният үзәгендә хәйрия концерты һәм «Балага ярдәм ит» акциясе нәтиҗәләре буенча аукцион булды. Мэрия ярдәме белән, инициатив төркем һәм Казанның «Краски жизни» фонды (аның эшчәнлеге коммерциягә нигезләнмәгән) тарафыннан 5-27 март көннәрендә уздырылган әлеге акция Балалар республика клиник хастаханәсенең онкогематология бүлегенә акчалата ярдәм күрсәтүне күздә тота.

Онкогематология бүлегендә исә ярты яшьтән алып 16 яшькә кадәрге 67 бала берьюлы дәвалана. Хәзерге вакытта бүлекнең 2шәр кешелек 7 палатасын төзекләндерүгә, дәваланучылар өчен урын-җир әйберләре, раскладушкалар һәм матрацлар, кер киптерү җайланмалары һ.б. кирәк-яракларга ихтыҗ зур. Оештыручылар шулай ук авыру балаларның ата-анасына дарулар һәм эндопротезлар алуда ярдәм итәргә дә ниятли.

Акция уңаеннан шушы хастаханәдә дәвалау курсы узучы балалар да үзләреннән өлеш кертә: кайберләре рәсемнәр, аппликацияләр, уенчыклар ясап җибәргән, кайсылары – чигешләр. Шушы кул эшләнмәләре аукционда сатуга куелган. Казанлылар акчалата ярдәмне хастаханә бүлегенең исәп-хисап счетына күчерү юлы белән дә, үзләре китереп тә тапшыру җае таба, кайберләре төзелеш материаллары тәкъдим итә.