Казанда Ауропа көнен үткәрү традициягә әверелергә мөмкин

28 мартта Татарстан Дәүләт Советы Рәисе Фәрит Мөхәммәтшин Казанда Ауропа көнен ел саен үткәрү тәкъдиме белән чыкты. Татарстан Дәүләт Советы Рәисе Фәрит Мөхәммәтшин Ауропа Комиссиясенең Россиядәге вәкиллеге башлыгы Марк Франко белән очрашуда шундый фикер белдерде. Очрашу Казанда Ауропа көне чаралары кысаларында узды.

Фәрит Мөхәммәтшин Ауропа бәйрәмен Татарстан башкаласында үткәрергә тәкъдим иткәннәре өчен республика кунакларына рәхмәт белдерде. “Казанда Ауропа көне кысаларында узучы чаралар җәмгыятьнең икътисади, мәдәни, спорт тормышына, Ауропа илләре белән дус–тату яшәүгә этәргеч бирде”, – диде Татарстан парламенты башлыгы.

Фәрит Мөхәммәтшин билгеләп үткәнчә, Казанда Ауропа көнен үткәрү республиканың Ауропа илләре белән хезмәттәшлеген алга таба тирәнәйтүдә бәйләнеш ноктасы һәм перспективасы булуын тагын бер кат раслый. Татарстан Дәүләт Советы Рәисе Казанда Ауропа көнен үткәрүне традициягә әверелдерергә тәкъдим итте. “Бу бик яхшы булыр иде”, – диде ул.

Үз чиратында, Марк Франко очрашу тәмамлангач үткәрелгән матбугат конференциясендә белдергәнчә, Ауропа Комиссиясенең Россиядәге вәкиллеге киләсе елда да Казанда Ауропа көнен үткәрергә ниятли. “Әгәр безнең партнерлар моны кирәк дип тапса һәм хәзерге энтузиазмны сакласа, Казанда Ауропа көне чаралары уңышлы узса, без бу көннәрне киләсе елда да уздырачакбыз”, – диде ул.

“Казанда Ауропа көнен беренче тапкыр үткәрүнең зур кызыксыну уятуын исәпкә алып, без Ауропа Комиссиясенең Россиядәге вәкиллеге моңа каршы килмәс дип өметләнәбез һәм Казанда Ауропа көнен уздыру традициягә әверелеп китәр дип уйлыйбыз”, – диде ТР Премьер–министры урынбасары – мәдәният министры Зилә Вәлиева.

Искәртеп узабыз, бүген Казанда беренче тапкыр Ауропа көне уза. Әлеге бәйрәмнең максаты – казанлыларга заманча Ауропа мәдәнияте һәм ауропалыларның тормышы турында мөмкин кадәр тулырак мәгълүмат бирү. Моңа кадәр Ауропа көне Мәскәү, Санкт–Петербург һәм Архангельскида узды.

Казанда Ауропа көне кысаларында “Гаммәви мәгълүмат чараларында тел күптөрлелеге” дигән дискуссия, Ауропа Берлеге халыклары телләре форумы, “Париж – Берлин” күргәзмәсе һәм башка чаралар оештырылды. “Ауропа көне” “Арена” дискоклубында Швеция ди–джее Dana Bergquist чыгышы белән төгәлләнәчәк.