Казанда 1 апрельдән алып 30ына кадәр шәһәрне чүп-чардан чистарту айлыгы игълан ителде

30 мартта Казан мэриясендә үткәрелгән республика башкаласы һәм аның муниципаль районнары җитәкчелегенең «дүшәмбе киңәшмәсе»ндә шәһәрне тышкы матурлау-бизәү һәм уңайлыклар булдыру комитеты җитәкчесе Роза Җаббарова хәбәр иткәнчә, 1 апрельдән 30 апрельга кадәр ел саен үткәрелә торган «айлык»ның чираттагысы Башкарма комитет карары белән игълан ителгән. Акция уңаеннан, аның барышын 7 комиссия тикшереп торачак. Шәһәрне санитар чистарту һәм матурлау буенча бурычлар билгеләү максатында, шуның буенча оештырылган шәһәр штабының киңәшмәсе уздырылган. Штаб утырышында район хакимиятләре, Россия кулланучылар күзәтчелеге һәм административ комиссия эшләрен оештыру буенча идарәләре, ТР экология милициясе, торак-коммуналь хуҗалык комитеты вәкилләре катнашкан.

«Хәзерге вакытта, Авиатөзелеш, Киров, Совет, Идел буе районнарыннан кала, Казан районнарында юлларның чокыр-чакырларын ямау эшләре алып барыла, барлыгы 1,5 мең квадрат метр гомуми мәйданда эш башкарылды инде», - хисап тотты Р.Җаббарова.