Фәрит Мөхәммәтшин: “Депутатларның җаваплылык тоеп эшләвен телим”

“Бу документ сезнең Татарстан Республикасы Дәүләт Советы депутаты икәнлегегезне раслый. Депутат таныклыгын кадерләп саклагыз. Ул бөтен чараларда диярлек катнашырга мөмкинлек бирә. Бу документ сезгә республика халкының күпчелеге тарафыннан аларның мәнфәгатьләрен теләсә кайсы аудиториядә, ТР Дәүләт Советында һәм РФ Дәүләт Думасында чагылдыру вәкаләтен бирә”, - дип белдерде бүген ТР Дәүләт Советы рәисе Фәрит Мөхәммәтшин депутат таныклыкларын тапшыру вакытында. Бүген депутат таныклыклары парламентта даими эшләүче һәм Казанда яшәүче 50 депутатка бирелде. Депутат значоклары элегрәк тапшырылган иде.

Фәрит Мөхәммәтшин сүзләренчә, депутат значогын тагып йөрергә оялмаска кирәк. Бигрәк тә ниндидер проблемалар алдында калган халык янында. Спикер фикеренчә, аны ТР Дәүләт Советы бинасына килеп җиткәч тагып, сессиядән соң салып кую килешеп бетми. “Мин сездән үтенеп сорыйм: тәвәккәллек һәм үз исемегезгә карата ихтирам күрсәтегез. Берәүне дә депутат булырга мәҗбүр итмәдек. Бөтенесенең депутат булып сайланасы килде. Әзерлекле күп кешеләр нәүмиз булып калды. Ахырдан үзебезгә уңайсыз булмасын өчен, бу мәсьәләдә сезнең белән баштан ук килешеп куйыйк, - диде парламент рәисе. - Барыгызның да җаваплылык тоеп эшләвегезне телим. Депутат һәрвакыт депутат булып калырга тиеш”.