ТР тормыш дәрәҗәсен тикшерү өлкәсендә Бөтендөнья Банкы белән хезмәттәшлеген дәвам итәчәк

Татарстан республикада тормыш дәрәҗәсен тикшерү буенча аналитик эшләр алып бару өлкәсендә Бөтендөнья Банкы белән хезмәттәшлеген дәвам итәчәк. Хәзер хезмәттәшлектә төп игътибар халыкның аз якланган катламына социаль ярдәм буенча дәүләт программаларын тагын да адреслырак итүгә биреләчәк. Бүген ТР Премьер-министры Рөстәм Миңнехановның Бөтендөнья Банкы белгечләре белән очрашуында шул хакта сүз барды, дип хәбәр итә Министрлар Кабинетының матбугат хезмәте.

Агымдагы елның 5 мартында Бөтендөнья Банкы белгечләре Татарстан Хөкүмәте башлыгына ТР тормыш дәрәҗәсен һәм сыйфатын мониторинглау өчен халык арасында уздырылган тикшеренүләрнең якынча нәтиҗәләрен игълан иткән иде. Бүгенге очрашуда банкның социаль программалар җитәкчесе Андрей Марков социаль сәясәт өлкәсендә тикшеренүләрне көчәйтергә дигән тәкъдим кертте. Ул аеруча мохтаҗ катламга социаль ярдәм өчен киткән чыгымнарның нәтиҗәлелеген бәяләү өчен кирәк. Банк белгечләре фикеренчә, бу мәсьәлә дөнья күләмендә икътисади кризис шартларында, бюджет акчалары бәрәкәтле тотылганда тагын да актуальләшә. “Дәүләт бирә торган акчаларның нәкъ менә ярдәмгә мохтаҗ гражданнарга эләгүе бик мөһим”, - ди алар. Республикада яшәү дәрәҗәсе өлкәсендәге аналитик тикшеренүләр социаль түләүләрне тагын да адреслырак итәргә, бюджет акчаларын нәтиҗәле файдаланырга ярдәм итәргә тиеш, дип саный Андрей Марков. Бөтендөнья Банкы белгечләре тәкъдиме Рөстәм Миңнехановта хуплау тапты.

Банк белгечләре 3 атна дәвамында эш планын билгеләп, аны ТР Хөкүмәтенә раслауга тәкъдим итәргә тиеш.