Казанда Россия авиация предприятиеләре җитәкчеләренең киңәшмәсе узачак

РФ сәнәгать һәм сәүдә министры Виктор Христенко 30–31 март көннәрендә Казан һәм Ульяновски предприятиеләрендә авиация һәм вертолет төзелешен үстерү буенча берничә киңәшмә үткәрәчәк. Бу хакта Россия Сәнәгать һәм сәүдә министрлыгының матбугат хезмәте хәбәр итә.

Казанга эш сәфәре кысаларында Россия Федерациясе сәнәгать һәм сәүдә министры Виктор Христенконың ТР Премьер–министры Рөстәм Миңнеханов белән Россия авиатөзелеш предприятиеләре җитәкчеләре катнашында берничә киңәшмәсе планлаштырылган. Иртәгә Виктор Христенко җитәкчелегендәге Россия Сәнәгать һәм сәүдә министрлыгы делегациясе “Ту–214” самолетлары һәм хәрби бомбардировщиклар эшләп чыгаручы авиатөзелеш предприятиесе – “С.Горбунов исемендәге Казан авиация җитештерү берләшмәсе” ААҖндә, шулай ук “Ми–8”, “Ми–17” һәм “Ансат” вертолетлары җитештерүче “Казан вертолет заводы” ААҖндә булачак.

Ульяновскига эш сәфәре барышында “Берләштерелгән авиатөзелеш корпорациясе”нә керүче “Авиастар–СП” ЯАҖ предприятиесе белән танышу планлаштырылган. Предприятие мәйданчыгында РФ сәнәгать һәм сәүдә министры Виктор Христенко, губернатор – Ульяновски өлкәсе Хөкүмәте рәисе Сергей Морозов, Россия авиация предприятиеләре җитәкчеләре катнашында заказчыга тантаналы шартларда “Ту–204–100” самолетын тапшыру–кабул итү процедурасы узачак.

“Авиастар–СП” ЯАҖ мәйданчыгында предприятиене үстерү, төп җитештерү программасын үтәү һәм киләчәге зур булган продуктларны үзләштерү мәсьәләләре буенча киңәшмә үтәчәк.