Равил Моратов: ”Икътисад һәм җәмгыять корылышы нигезе мәктәптә ята”

“Без яшьләрнең белем алу дәрәҗәсенә зур игътибар бирәбез. Моның өчен республикада барлык мөмкинлекләр дә җитәрлек: гуманитар һәм техник вузлар эшләп тора. Аларны җитештерү тармагы белән бәйләү зарур”, - дип белдерде педагогларның бүген Казанда уза торган бөтенроссия конференциясендә ТР Премьер-министрының беренче урынбасары Равил Моратов.

Аның сүзләренчә, вузлар белән икътисадның реаль секторы арасында элемтә бик зәгыйфь. “Кайбер вакытта Хөкүмәт, җитештерү тармагы һәм вузлар һәрберсе үзенә аерым яши кебек тоела. Студентлар диплом алу алдыннан предприятиеләрдә практика үтә алыр иде. Без быел бу эшкә нигез салдык, әлеге юнәлешне алга таба үстерәчәкбез”, - диде вице-премьер.

Равил Моратов әйтүенчә, бүгенге көндә икътисадны үстерү мәсьәләсе бөтен кешене кызыксындыра. “Ә икътисадның нигезе, җәмгыятьнең корылышы нигезе мәктәптә ята. Укытучы укучының күңеленә ничек сала, җәмгыять тә шул рәвешле үсә”, - дип белдерде ул. Һәм: “Безнең мәктәпләрдә, балалар бакчаларында эшлисе эшләр күп әле. Мәктәпне тәмамлап чыкканда укучы нинди күнекмәләргә ия булырга тиеш: безгә шул хакта уйланырга кирәк”, - дип тә өстәде.

Вице-премьер үз чыгышында икенче буын федераль белем бирү стандартларын эшләү мәсьәләсенә тукталды. Аның фикеренчә, бу стандартларны эшләгән вакытта субъектларның фикерләрен тыңларга әзер булу ике арада яхшы диалог баруны аңлата.

“Безгә, үз мөмкинлекләребезне бәяләп, ватан өчен бергәләп эшләргә кирәк. Шул вакытта безнең тәрбия яшьләргә дә барып җитәр иде”, - дип, Равил Моратов залдагыларга 60 нчы еллардагы тәрбия алымнарын искә төшерергә чакырды. Ул мисалга РФ Мәгариф һәм фән министры Исаак Калинаны китереп: “Менә шундый җитәкчеләр булса, кирәкле вакытта тиешле карар кабул итә алырлар иде”, - диде.