"Татнефть" экология буенча Россиядә иң яхшылар арасында

"Татнефть" компаниясе “Россиянең иң яхшы 100 компаниясе. Экология һәм экология менеджменты” конкурсында өченче тапкыр лауреат булды. Моннан тыш компаниянең генераль директоры Шәфәгать Тәхаутдинов “Ел экологы” мактаулы билгесе белән бүләкләнде.

Федерация Советы, Дәүләт Думасы, РФ Табигый ресурслар һәм экология министрлыгы, Россия Сәүдә-сәнәгать палатасы, Россиянең сәнәгатьче һәм эшмәкәрләр берлеге катнашында үткәрелгән конкурсның финалы “Экология һәм производство. Икътисади механизм үсеше һәм әйләнә-тирә мохитне саклау перспективалары” темасына багышланган III бөтенроссия конференциясе һәм “Дөньяви кризис шартларында глобаль экология һәм сәнәгать куркынычсызлыгы” I Халыкара конференциясе кысаларында үтте.

Чарада балансланган әйләнә-тирә мохите өчен чыгыш ясаучы парламентарийларның "Globe International" халыкара оешмасы вәкилләре беренче тапкыр катнашты.

Конкурсның эксперт советы җиңүчеләрне билгеләгәндә табигатьне саклау чараларына юнәлдерелгән акча динамикасын, әйләнә-тирә мохиткә тискәре йогынтыны киметү параметрларын, экология программасының үтәлешен, табигатьне саклау эшләрендә аның нәтиҗәлелеге һәм системалы булуын, предприятиеләрнең бизнес алып бару территориясендә табигатьне саклау эшчәнлеген оештыруны исәпкә алган.

Соңгы 10 елда "Татнефть" ике зур экология программасын гамәлгә куйды. Хәзерге вакытта 2015 елга кадәр исәпләнгән өченче экология программасы кысаларында компания табигатьне саклау, сәнәгать куркынычсызлыгы, хезмәт һәм әйләнә-тирә мохитне саклау өлкәсендә бердәм интеграцияләнгән сәясәт алып баруны дәвам итә. Программа буенча каралаган табигатьне саклау чараларына 2000–2008 елда бөтен финанслау чыганаклары буенча 29 миллиард сум акча юнәлдерелгән, шул исәптән 2008 елда 4,875 миллиард сум, дип хәбәр итә компаниянең матбугат хезмәте.