Эрик Сантрон: «FISU белән Универсиаданың оештыру комитетына арадашчы кирәк»

Казанның Универсиадага әзерлек барышы белән танышу өчен килгән FISU генераль секретаре Эрик Сантрон белән җәйге Универсиадалар директоры Марк Вандеплас, «Татмедиа» агентлыгында үткәрелгән матбугат конференциясендә хәбәр итүләренчә, әзерлек темпларыннан канәгать. Гомумән, Казан Универсиадасына кадәр алда әле 4 ел вакыт калса да, хәзердән үк әзерлек эшләре үткәрелә, спорт корылмалары төзелә икән, дип билгеләп үттеләр алар спорт объектларын карап чыкканнан соң. Спорт корылмаларыннан тыш, Универсиада авылында матбугат үзәге дә калкып чыгачак. Универсиадада 140 ил катнаша ала, һәр чит илдән 1әр журналист килергә мөмкин. Марк Вандеплас сүзләренчә, чит илләрдән, гадәттә, 100ләп журналист килә, калганнары – җирле журналистлар. Мәсәлән, Кытай Универсиадасында барлыгы 1 меңләп журналист уеннар барышын яктыртачак.

Татарстан җирендә FISU җитәкчелеге белән Россия студентлар берлеге президенты Олег Матыцин ТР Премьер-министры һәм Казан шәһәре мэры белән очрашып, кайбер мәсьләләрдә фикер алышырга өлгергән. FISU белән Универсиаданың оештыру комитетына арадашчы, ягъни Казан Универсиадасына әзерлек, аның барышы, гомумән, шуңа бәйле бөтен нечкәлекләрне дә белә торган ышанычлы һәм эшлекле кеше кирәклеге хакында Премьер-министр белән мэрга тәкъдим ясалган. Эрик Сантрон сүзләренчә, аңа бигрәк тә республика җитәкчелегенең позициясе ошаган: бөтендөнья финанс кризисына карамастан, Универсиада бюджеты һәм инвестицияләр җәлеп итү күләме әллә ни киметелмәячәк. Финанс яктан тыш, студентларның волонтерлык хәрәкәтенә талантлы яшь татарстанлыларның күпләп кушылырга теләк белдерүе исә аны аеруча шатландырган.