Казанда “Туризм индустриясе” күргәзмәсе ачыла

“Казан ярминкәсе” берничә көнгә туризм үзәгенә әйләнәчәк. Бүген биредә традицион “Туризм индустриясе” махсуслаштырылган күргәзмәсе эшли башлый. “Ќәйне хәзердән үк башла!” дигән девиз белән 17 апрельгә кадәр эшләячәк бу чараны ТР Яшьләр эшләре, спорт һәм туризм министрлыгы «Казан ярминкәсе» ААЌ, Казан шәһәре мэриясе һәм ТР Туристлык агентлыклары ассоциациясе белән берлектә быел 12 нче тапкыр оештыра.

Яз алдагы туристлык сезонына хезмәттәшләр эзләү, туристлык агентлыклары һәм операторлар өчен яңа туристлык продуктларын, бәяләр сәясәтен формалаштыру чоры. Казан күргәзмәсе әнә шул максатларга хезмәт итә.

Ел саен уздырылучы әлеге күргәзмә туристлык бизнесы белән шөгыльләнүчеләрдә дә, күргәзмәне карарга килүчеләрдә дә зур кызыксыну уята, ди оештыручылар. “Туризм индустриясе” Россия, чит илләрнең 100 дән артык компаниясен, туризм белән идарә буенча федераль, төбәк органнарын үз мәйданына җыя. Аның әһәмияте Россия төбәкләрендәге мәдәни-тарихи, туристлык инфраструктурасының үсеш мөмкинлекләрен күрсәтү ягыннан да зур. Быел катнашырга теләк белдергән компанияләрнең күпчелеге эчке туризм һәм читтән кергән туристларның ялын оештыру буенча махсуслашкан. Шул ук вакытта, ялларын чит илләрдә уздырырга теләүчеләр, танып белү һәм экзотик турларга өстенлек бирүчеләр мәнфәгатьләре дә исәпкә алына, дип хәбәр иттеләр “Казан ярминкәсе”ннән. Күргәзмәдә туристлык компанияләре белән бергә туристлык индустриясенең актив катнашучылары булган кунакханәләр, рестораннар, шифаханәләр, авиакомпанияләр, иминият компанияләре, тел өйрәнү мәктәпләре дә катнаша. Быел да оештыручылар күргәзмәне эшлекле һәм күңел ачу программаларына бай булачак дип вәгъдә итә. 15-17 апрель көннәрендә «Казан ярминкәсе»ндә 22 экспозиция эшләячәк. Аларда круизлар, эшлекле, пляжда ял итү, савыктыру туризмы, актив һәм маҗаралы сәяхәтләр, балалар ялын оештыру, шифаханә, пансионатлар, туризмдагы мәгълүмат технологияләре, төбәк туристлык оешмалары, бу өлкә өчен белгечләр әзерләүче уку йортлары һ.б. хакында тулы мәгълүмат бирелә. Эшлекле программага килгәндә, Туризм буенча Бөтенроссия Координация советының “Россия төбәкләре- Мәскәү килешүе” дигән утырышы шуның иң зурысы булачак. Шулай ук программага туристлык компанияләрен презентацияләү, шоу-программалар, юлламалар һәм бүләкләр уйнату белән бәйле чаралар кертелгән.

“Туризм индустриясен” бу көннәрдә шул ук мәйданда эшләячәк “Кунакчыллык индустриясе” күргәзмәсе тулыландыра.