Казанда Шанхай хезмәттәшлек берлегенең VI пленар утырышы уза

27 апрельдә Казанда Шанхай хезмәттәшлек берлегенең (ШХБ — ШОС) VI пленар утырышы ачылды. Ратушадагы “Милли мәдәни традицияләр һәм яшьләр” дигән исем астындагы чара РФ Мәдәният министры Александр Авдеев җитәкчелегендә уза. Утырышта ТР Премьер-министры Рөстәм Миңнеханнов һәм вице-премьер — мәдәният министры Зилә Вәлиева катнаша.

А.Авдеев җыенны ачып, Шанхай хезмәттәшлек берлеге утырышының Казанда — Россиянең өченче башкаласында узуына, һәм дә меңъеллык каланың әһәмиятенә басым ясады. Њз чиратында, А.Авдеев июнь аенда Екатеринбургта ШХБ дәүләтләре әгъзаларының Сәнгать фестивале узачагын да әйтеп узды.

Билгеле булганча, Шанхай хезмәттәшлек берлеге әгъзалары башкалада узган кичәге үзенчәлекле чараларда — шагыйрь Г.Тукай туган көненә багышланган Шигырь бәйрәмендә катнашты, шулай ук аңа багышланган “Шагыйрь мәхәббәте” операсын тыңлады. Татарстан Хөкүмәте җитәкчелегенә мөрәҗәгать итеп, РФ Мәдәният министры үзенчәлекле программа өчен рәхмәт белдерде.

Чыгышында Рөстәм Миңнеханов Казанның Көнчыгыш белән Көнбатышны бәйләп торучы үзәк булуын билгеләп үтеп, биредә төрле милләт вәкилләренең дустанә мөнәсәбәттә яшәвен һәм Татарстан җирендә традицияләрнең буыннардан-буыннарга ирешүен дә белдерде. Татарстанда мәдәниятнең елдан-ел үсеш ала баруына басым ясап, ТР Президенты Минтимер Шәймиевнең Шанхай хезмәттәшлек берлеге вәкилләренә юллаган сәламләвен укып ирештерде.

ШХБнең эш программасына килгәндә, Ратушада узган утырыштан соң, бүген делегатлар “Хәзинә” милли сәнгать галереясендә Шанхай хезмәттәшлек берлеге вәкилләренең гамәли сәнгать күргәзмәсе ачылышында була, соңыннан ТР Президенты Минтимер Шәймиев белән очраша. Моннан тыш, кичен башкала кунаклары “Пирамида” мәдәни-күңел ачу үзәгендә узачак “Созвездие-Йолдызлык” Халыкара телевизион эстрада яшьләр фестивале Гала-концертын карый һәм иртәгә танылган язучы Чыңгыз Айтматов истәлегенә багышланган чарада катнаша.

Билгеле булганча, ШХБ делегатлары арасында Кыргызстан, Њзбәкстан, Казакъстан, Таҗикстан, шулай ук күзәтчелек итүче илләр — Иран, Џиндстан, Монголия дәүләтләре мәдәният министрлары бар.