Казанда “Мәгариф. Карьера - 2009” дип исемләнгән махсуслашкан күргәзмә эшли башлады

8 апрель көнне “Казан ярминкәсе” күргәзмәләр үзәгендә “Мәгариф. Карьера - 2009” дип исемләнгән махсуслашкан күргәзмә эшли башлады. Љч көн дәвам итәчәк “Мәгариф. Карьера - 2009” күргәзмәсендә югары уку йортлары, дәүләти һәм шәхси белем бирү үзәкләре, махсуслашкан курслар, кадрлык агентлыклары, халыкны эш белән тәэмин итү үзәкләре тәкъдим ителә. Махсуслашкан күргәзмә укучыларны хезмәт базарындагы тәкъдимнәр белән таныштыруны, аларга консультацияләр бирүне, эшсезләрне эш белән тәэмин итүне максат итеп куя.

Ђлеге күргәзмә ел саен ТР Мәгариф һәм фән министрлыгы, ТР Хезмәт, мәшгульлек һәм социаль яклау министрлыгы, ТР Сәнәгать һәм сәүдә министрлыгы, Казан шәһәре мэриясе белән берлектә үткәрелә.

Бүгенге көндә, килеп туган икътисади вәзгыятьтән чыгып, сәнәгатьнең барлык тармак предприятиеләре өчен квалификацияле кадрлар әзерләү, белем бирү хезмәтләрен күрсәтү базарында һәм эшкә урнаштыру өлкәсендә үзгәрешләр кертү төп аспект булып тора. “Мәгариф. Карьера – 2009” күргәзмәсе нәкъ менә кирәкле мәгълүматны алу һәм туплау, Казан, Мәскәү, Санкт-Петербург, Саратов, Ульяновск шәһәрләреннән килгән 150дән артык уку йорты һәм предприятиеләр эшчәнлеге белән танышыр өчен эшлекле мәйданчык ролен үти.

Бигрәк тә бүгенге катлаулы базар шартларында яшьләр сайлаган белгечлеге буенча эшкә урнаша алмаганда, кемдер эшсез калганда әлеге күргәзмәнең актуальлеге кискен арта. Бүгенге көндә республикада эшсезләр саны 56 меңгә җитә. Рәсми рәвештә теркәлгән эшсезләрнең 35 процентын 16-29 яшьләрдәге егет-кызлар тәшкил итә.

Ел саен күргәзмә эшчәнлеге белән 40 меңнән артык кеше таныша. Эшлекле программа кысаларында фәнни-гамәли конференцияләр, “түгәрәк өстәл” утырышлары һәм башка чаралар уза. Быелгы 3 көнлек күргәзмәдә “Көндәшлеккә сәләтле белгечләрне һөнәри өзлексез әзерләүдә - инновацион технологияләр” дигән халыкара фәнни-гамәли конференция, “Укучы яшьләр тирәлегендә наркотиклар куллануга каршы тору” һәм “Яшьләр мохитендә хокук бозуларны профилактикалау” дигән семинарлар, “2013 елгы Бөтендөнья җәйге Универсиада өчен чит телне белгән кадрларны әзерләү мәсьәләләре” һәм “Белем бирү кредиты” дип аталган “түгәрәк өстәл” утырышлары оештырыла.