Бу атнада IV Казан венчур ярминкәсе узачак

Бу атнада Казанда IV венчур ярминкәсе уза. Татарстанда Венчур ярминкәләре уздыру тарихы 2005 елга барып тоташа. Нәкъ менә Казанның 1000 еллык юбилее елында Татарстан башкаласында I Төбәк Венчур ярминкәсе үткән иде. Беренче ярминкә Татарстан фәнни коллективлары перспектив эшләнмәләренең венчур инвесторларында зур кызыксыну уятуын күрсәтте. Икенче Төбәк ярминкәсе нәтиҗәсе буларак, ТР Хөкүмәте белән Россиянең Туры һәм венчур инвестицияләре ассоциациясе арасында хезмәттәшлек беркетмәсе имзаланды.

Ике тапкыр шул статуста оештырылганнан соң, узган елдан башлап ул Казан венчур ярминкәсе дигән яңа исем белән үткәрелә башлады. Татарстандагы һәм Идел буе федераль округына кергән башка төбәкләрдәге кече һәм урта бизнес компанияләренең инновация мөмкинлекләре тәкъдим ителә торган бу чараны «Идея» технопаркы, ТР Инвестиция-венчур фонды, Россиянең Туры һәм венчур инвестицияләре ассоциациясе ТР Министрлар Кабинеты, Фән һәм инновацияләр буенча федераль агентлык ярдәмендә оештыра. Узган елгы III Казан венчур ярминкәсендә Россиянең 14 шәһәреннән 120 дән артык инвестиция компаниясе тәкъдим ителгән иде. Алар нефть, газ, химия сәнәгате, машина, җиһазлар төзелеше, энергетика, мәгълүмат технологияләре, авыл хуҗалыгы, биотехнологияләр, медицина, фармокология, төзелеш кебек перспектив юнәлешләрне эченә алды.

ТР Инвестиция-венчур фондыннан хәбәр итүләренчә, быелгы ярминкә эшендә кече һәм урта эшмәкәрлеккә ярдәм чараларын гамәлгә ашыручы, фәнгә нигезләнгән бизнеска инвестицияләр җәлеп итү сәясәтен формалаштыручы төбәк һәм федераль структуралар вәкилләре, Россия һәм чит илләрнең финанс оешмалары, Татарстанның эшлекле даирә вәкилләре белән эшлекле мөнәсәбәтләр урнаштырырга ниятләгән бизнес җәмәгатьчелек катнашачак. Барлыгы 100 дән артык компания катнашырга теләк белдергән.

IV Казан венчур ярминкәсендә катнашучылар технологияләр өлкәсендә эшмәкәрлекне үстерүгә багышланган семинарда катнашу мөмкинлеген ала. Американың гражданлык тикшеренүләре һәм ТР Инвестиция-венчур фондлары оештырган бу чара бүген башланды.