Казан туристлык порталы Татарстан башкаласына кунаклар җәлеп итәргә тиеш

15 апрельдә “Казан ярминкәсе” күргәзмә үзәгендә ачылган “Индустрия туризма-2009” күргәзмәсе кысаларында Татарстан башкаласы туристлык интернет-порталы тәкъдир ителде. Шәһәр башкарма комитетының тышкы элемтәләр һәм туристлык комитеты җитәкчесе Сергей Иванов яңа сайтның мөмкинлекләре турында сөйләде.

Бөтендөнья челтәрендә gokazan.ru адресы буенча урнашкан яңа туристлык интернет-порталы 3 айга якын эшли. С.Иванов билгеләп үткәнчә, мондый ресурска ихтыяҗ Россия һәм чит ил туристларының маршрут сайлауда Интернетның зур роль уйный башлавына бәйле. Белгечләр порталны эшләгәндә күп кенә шәһәрләрнең, шул исәптән Мәскәү һәм Санкт-Петербургның шундый сайтларын өйрәнгәннәр. Нәтиҗәдә, алдынгы технологияләрне кулланып заманча интернет-сайт ачылды.

Казан туристлык порталының төп эчтәлеге шәһәрнең истәлекле урыннары, шәһәр инфраструктурасы объектлары, кунакханәләр, рестораннар web-карточкаларыннан гыйбарәт. Хәзер сайтта адрес, телефон язылган, туристлык өчен кызыклы объект фотолары, спорт һәм мәдәният чаралары анонслары язылган 500 гә якын карточка бар.

Шулай ук сайтта панорамалы фотолар бүлеге бар, хәзер биредә Казанның кызыклы 35 урыны панорама фотосы урнаштырылган.

Порталда аерым истәлекле урыннарны караудан тыш, виртуаль экскурсияләр дә ясарга мөмкин. Текстка бәйле фотолар профессиональ экскурсоводлар тарафыннан эшләнгән. Порталда Казан турында файдалы һәм кызыклы мәкаләләр урнаштырылган, билетлар һәм кунакханәдә урыннар броньлау формалары бар. Сайтның инглиз версиясен gokazan.com адресы буенча карап була. Сергей Иванов хәбәр итүенчә, киләчәктә сайтны тагын берничә телдә чыгару ниятләнә.

Аның фикеренчә, туристлык порталын эшләү шәһәрнең туристлык индустриясен үстерүдә җитди адым булып тора. Ул республика башкаласына килүче кунаклар санын арттырырга мөмкинлек бирәчәк.