Казанда Алмания көннәре старт ала

20-26 апрель көннәрендә Казанда Алмания көннәре узачак. Атналыкның ачылышы бүген ТР Милли китапханәсендә була, дип белдерә ТР Мәдәният министрлыгы матбугат хезмәте.

Алмания көннәренең программасы бай. 23се көнне аның кысаларында Татарстандагы Алман йортында “Толерантлык дәресләре: Алмания — Ислам илләре” проекты тәкъдим ителә, 24 апрельдә “УНИКС” концерт-спорткомплексында “Киләчәккә караш” дигән фәнни-гамәли конференция узачак. 25ендә “Тинькофф” ресторанында KLEE төркеме концерты көтелә. Билгеле булганча, “Алмания көннәре” проекты традицион рәвештә Россиянең төрле төбәкләрендә үткәрелә. Биредә ул КДУның алман мәгарифе, фәне һәм мәдәнияте үзәге тарафыннан, Алманиянең Россиядәге Илчелеге, Гете исемендәге институт, Алман академик алмашулар үзәге, Р.Бош исемендәге фонд, Татарстандагы Алман йорты, Казан шәһәре мэриясе ярдәме белән оештырыла. Проект “Бердәм киләчәк” дигән шигарь астында уза.

Алмания атналыгы кысаларында казанлылар Алмания белән бәйле актуаль темаларга багышланган ике күргәзмә белән дә таныша, “Мир” кинотеатрында фильмнар күрә алачак. Моннан тыш, яшь каләм иясе Маркус Ферстер үзенең әсәрләре белән таныштыра һәм алман теле тирәнтен үзләштерелә торган башкала мәктәпләрендә иҗади семинарлар да оештыра.