Ф.Мөхәммәтшин Кытай Халык Республикасының татар җәмгыяте делегациясе белән очрашты

12 май көнне ТР Дәүләт Советы Рәисе Фәрит Мөхәммәтшин Кытай Халык Республикасының татар җәмгыяте делегациясе белән очрашты. "Татарстан безнең икенче йортыбыз", - дип белдерәләр ТР вузлары студентлары - Кытай Халык Республикасының татар җәмгыяте вәкилләре. Нәкъ менә аларга республика вузларында белем алу мөмкинлеге бирелде. Бүген алар барысы да (50дән артык кеше) республика җитәкчелегенә һәм Бөтендөнья татар конгрессы Башкарма комитетына Татарстанда туган телдә яхшы югары белем алу мөмкинлеге биргән өчен рәхмәт белдерделәр. Очрашуда Фәрит Мөхәммәтшин берничә ел элек ТР Президенты Минтимер Шәймиев Кытай татар җәмгыяте вәкилләренә республика вузларында белем алуда ярдәм итү бурычы куйды, дип сөйләде. "Вуз ректорлары бу фикерне хуплады", - дип билгеләп үтте Татарстан парламенты башлыгы.

"Кытайда татарлар күп. Шуңа күрә белем алырга теләүче яшьләргә ярдәм итү мөһим. Кытай Халык Республикасы белән даими элемтәдә торабыз. Кытай рәисенең Казанга соңгы визиты элемтәләрне ныгытырга кирәклеге турында сөйли. Аерым алганда, мәдәни-мәгариф юнәлеше буенча да элемтәләрне үстерергә кирәк", - дип саный ТР Дәүләт Советы Рәисе.

Бөтендөнья татар конгрессы Башкарма комитеты Рәисе, ТР Дәүләт Советы депутаты Ринат Закиров 2005 елда Кытай Халык Республикасының татар җәмгыяте вәкилләре -студентларның беренче төркеме формалашкан иде, дип искә төшереп үтте. КДТУ (КХТИ) базасында 32 кеше укыды. Бүгенге көндә тагын 25 кеше Казан дәүләт университетында белгечлек ала.

"Бу программа Татарстан һәм Кытай татарларының ныклы хезмәттәшлеге өчен зур мөмкинлекләр бирә", - дип өстәде ул. "Без бу студентлар яхшы белгечлек кенә алып калмас, ә рухи яктан баерлар дип ышанабыз. Моның өчен республикада барлык шартлар да бар", - дип ассызыклады Ринат Закиров.

КДУ профессоры, ТР Фәннәр Академиясе академигы Миркасыйм Усманов үз чиратында ТРда белем алырга теләүчеләр күп, дип билгеләп үтте. "Һәм сезгә булган ышанычны акларга тиешсез", - дип мөрәҗәгать итте яшьләргә М.Усманов.

Бөтенкытай халык вәкилләре җыены депутаты, профессор, фәннәр докторы Абдулла Аббас республика җитәкчелегенә җылы кабул иткәннәре өчен рәхмәт белдерде. Ул Кытай Халык Республикасы территориясендә яшәгән барлык татарлар исеменнән зур сәлам тапшырды. Шулай ук А.Аббас ике яклы хезмәттәшлекне ныгыту буенча үз тәкъдимнәрен белдерде. Аерым алганда, ул Татарстан Республикасы белән Кытай Халык Республикасы арасында даими авиарейс һәм ТР Дәүләт Советы белән Бөтенкытай халык вәкилләре җыены депутатлары арасында даими элемтә булдырырга тәкъдим итте.

Колҗа шәһәренең Татар мәдәни җәмгыяте рәисе урынбасары Торсынтай Галиев сүзләренчә, туган телдә белем алу мөһим. "Бу татар телен киләчәк буыннар өчен саклау мөмкинлеге", - диде ул.

Очрашу ахырына якынлашканда Фәрит Мөхәммәтшин глобальләштерү шартларында туган телне саклау проблемасы зур әһәмияткә ия, дип билгеләп үтте. Очрашуда ТР Президенты каршындагы халыкара мәсьәләләр буенча Дәүләт киңәшчесе - Тышкы элемтәләр департаменты директоры Тимур Акулов, мәдәният, фән, мәгариф һәм милли мәсьәләләр комитеты рәисе Разил Вәлиев, Бөтендөнья татар конгрессы Башкарма комитеты вәкилләре катнашты.