Сингапур белән Татарстан хезмәттәшлек перспективаларын барлый

Сингапур Республикасының мәгариф һәм дәүләт идарәсе өлкәләрендәге тәҗрибәсе Татарстан өчен файдалы булырга мөмкин. Бүген бу хакта ТР Министрлар Кабинетында Премьер-министр Рөстәм Миңнеханов белән очрашу вакытында Сингапур Республикасының РФ Гадәттән тыш һәм Тулы вәкаләтле илчесе Саймон Тенсинг де Круз белдерде. Бу хакта Министрлар Кабинетының матбугат хезмәте хәбәр итә.

Сингапур илчесенең Татарстанга бу беренче танышу сәфәре. Илче көн дәвамында ТР сәнәгать һәм сәүдә министры Равил Зарипов, икътисад министры Марат Сафиуллин, Сәүдә-сәнәгать палатасы җитәкчесе Шамил Агеев белән очрашырга, “Алабуга” махсус икътисади зонасы белән танышырга өлгерде. Саймон Тенсинг де Круз Хөкүмәт йортындагы очрашуда сәфәр барышында икътисад, үсеш, инновацияле принципларны куллану буенча ике республика арасында уртак якларны ачыклавын җиткерде. Аның сүзләренә караганда, бу охшашлык ике арада хезмәттәшлекне тагын да кызыклырак һәм уңышлырак итәчәк.

Премьер-министр билгеләп узганча, Татарстанда бик күп проектлар -махсус икътисади зона, технопарклар, мәгариф өлкәсен реформалаштыру - Сингапур инициативаларын өйрәнгәннән соң гамәлгә ашырыла башлады. Рөстәм Миңнеханов белдергәнчә, бүген Татарстанны бу ил белән суднолар төзү, заманча медицина, мәгълүмат технологияләре, нефтехимия өлкәләрендәге хезмәттәшлек кызыксындыра. Ул аерым алганда мәгариф өлкәсендәге хезмәттәшлеккә тукталып, биредә Сингапур тәҗрибәсенең бик файдалы булуын ассызыклады. Хөкүмәт башлыгы Сингапур илчесенең чираттагы Россия-Сингапур форумына чакыруын кабул итеп алды. Рөстәм Миңнеханов, үз чиратында, Сингапурның эшлекле даирә вәкилләренең Татарстанга сәфәрен оештыру тәкъдимен кертте. Бу Татарстанның икътисади мөмкинлекләре белән якыннан танышып, хезмәттәшлекнең перспективаларын билгеләү өчен файдалы булачак. Киләчәктә Татарстаннан берничә җитәкчене дәүләт идарәсе буенча тәҗрибә өйрәнү өчен Сингапурга укырга җибәрү нияте дә бар.