ТР Министрлар Кабинетында видеокиңәшмә узды

Быел Татарстанда 2 млн. кв. м мәйданда торакны сафка бастыру бурычы куелган. Узган беренче квартал эчендә еллык план биременең 33 проценты башкарылган. Ягъни бу өч ай эчендә 660 мең кв. метр торак сафка баскан дигән сүз. Ђлеге мәгълүматларны бүген ТР Министрлар Кабинетында узган видеокиңәшмәдә ТР төзелеш, архитектура һәм торак-коммуналь хуҗалыгы министры Марат Хөснуллин җиткерде.

Беренче өч ай күрсәткечләренең, узган елның шул чорына караганда, 30 процентка артыграк булуы күзгә ташлана. Премьер-министр Рөстәм Миңнеханов ассызыклаганча, бу үсешкә узган ел башланган төзелешләр исәбенә ирешелгән. “Быел куелган план йөкләмәсен үтәү шарт. Төп игътибар социаль ипотека буенча төзелүче торакка биреләчәк”, -ди Хөкүмәт башлыгы. Билгеле булганча, 2009 елда әлеге программа буенча 800 мең кв. м торакны тапшыру каралган Премьер-министр фикеренчә, бу программаның бер яктан, төзелеш предприятиеләрен эш белән тәэмин итүдә роле зур булса, икенчедән, ул зур ихтыяҗны канәгатьләндерү өчен кирәк. Премьер социаль ипотека буенча торак төзелеше белән капиталь ремонтның һәр муниципалитет өчен җитди социаль проект булуын тагын бер тапкыр ассызыклады. Аның фикеренчә, бу проектлар Хөкүмәт һәм муниципалитетлар эшчәнлегендә төп приоритетлар булачак. Хөкүмәт башлыгы киңәшмә эшендә катнашкан җаваплы структураларга быел планга кертелгән объектларның барысы буенча да проект-смета, рөхсәт документларын әзерләп бетерү бурычын куйды.

Быел планда каралган социаль ипотека йортларының өчтән бер өлеше Казанда төзеләчәк. Чиратта торучыларның төп өлеше башкалага туры килә. Алдагы еллар тәҗрибәсе күрсәткәчә, программаны биредә гамәлгә ашыру авыррак бара. Бүген дә кайбер проблемалар бар. Шәһәр һәм Дәүләт торак фонды җитәкчелеге белән узган сөйләшүләрдән соң, Премьер-министр, проблемаларның бер атна эчендә хәл ителәчәген ышандырды.

Төзелеш эшләренең тоткарлыксыз алып барылуы, планны үтәп чыгу, беренче нәүбәттә, финансларга бәйләнгән. Премьер-министр ТР Финанс, Ќир һәм мөлкәт мөнәсәбәтләре министрлыкларын, муниципалитетларны Дәүләт торак фондына взнослар җыелуын актив тәэмин итәргә чакырды. Аның фикеренчә, финанс “маясы ” тупланмый торып, бу программа эшли алмаячак. Социаль программаны финанслауда катнашырга йөкләмә алган һәр предприятие аны үтәргә тиеш. Алар шул юл белән үз хезмәткәрләрен торак белән тәэмин итәргә дә, мохтаҗ башка категория гражданнарны тораклы итүгә дә ярдәм итә. Рөстәм Миңнеханов бу җаваплылыктан качарга омтылган предприятиеләрнең исемлеге төзеләчәген хәбәр итте.