Казанда ТР Фәннәр академиясе президиумының чираттагы утырышы булды

9 апрельдә Казанда ТР Фәннәр академиясе президиумының чираттагы утырышы булды. Анда ТР Премьер–министрының беренче урынбасары Равил Моратов катнашты.

Президиум эшенең көн тәртибендә берничә мәсьәлә бар иде. Кадрларның полипрофессиональ проект әзерлеге турындагы мәсьәлә аларның игътибарын аеруча нык җәлеп итте. Ђлеге проблема буенча доклад белән А.Н.Туполев исемендәге КДТУның укыту эшләре буенча проректоры, ТР Фәннәр академиясенең мөхбир–әгъзасы Газиз Мингалиев чыгыш ясады.

Аның сүзләренә караганда, югары уку йорты студентлары предприятиеләрнең конкрет заказлары белән эшләячәк һәм яңа проектлар әзерләячәк система бик тә уңайлы. Эш шунда, югары уку йортын тәмамлаган яшьләр эшкә урнаша алачак, ә предприятиеләр уку барышында аларның хезмәтенә түләгән акчалар чыгымнарны кайтарачак. Бу юнәлештә эш алып барыла инде, проектта А.Н.Туполев исемендәге Казан дәүләт техник университеты, Казан дәүләт технология университеты, Казан дәүләт энергетика университеты һәм Казан дәүләт архитектура–төзелеш университеты катнашырга теләк белдергән.

Равил Моратов ассызыклап үткәнчә, әзерләнә торган программаны инде бу этапта ук хупларга кирәк, чөнки шул рәвешчә республика талантлы һәм энергияләре ташып торган яңа көчләргә ия була. ТР Премьер–министрының беренче урынбасары фикеренчә, проектны әзерләүдә республика министрлык һәм ведомстволары да катнашачак.

Утырышта катнашучылар “Прометей” фәнни–тикшеренү институтындагы үзгәрешләргә кагылышлы мәсьәлә хакында да фикер алышты. Искәртеп узабыз, 6 гыйнварда әлеге институтның җитәкчесе, Татарстанның атказанган мәдәният хезмәткәре, совет яктылык музыкасына нигез салучы Булат Галиев вафат булды. Фәнни–тикшеренү институтының киләчәк язмышы әлегә билгеле түгел, әмма инде бүген үк аның якын көннәрдә үзгәртеп корылачагы турында карар кабул ителде.

Ш.Мәрҗани исемендәге Тарих институтында алып барылучы фәнни тикшеренүләрнең төп юнәлешләре турындагы доклад белән аның директоры Рафаэль Хәкимов чыгыш ясады. Ул институтның Ауразия киңлегендәге тарихны өйрәнү өлкәсендә әйдәп баручы үзәкләрнең берсе булырга омтылуын һәм илнең башка тикшеренү төркемнәре һәм музей үзәкләре белән актив хезмәттәшлек итүе хакында сөйләде. Рафаэль Хәкимовның сүзләренә караганда, киләчәккә билгеләнгән планнар тиздән гамәлгә ашырылачак.