Казанда француз телендәге театрлар фестивале узачак

12 - 14 апрель көннәрендә башкаланың А.Гайдар исемендәге яшьләр үзәгендә француз телендәге театрларның Бөтенроссия фестивале узачак. ТР Мәдәният министрлыгыннан алынган мәгълүматларга караганда, анда Санкт-Петербург, Иркутски, Пермь, Нальчик, Дзержински, Түбән Тагил, Чита, Самара, Тольятти, Түбән Новгород, Сарытау, Уфа һәм Казаннан коллективлар катнаша.

Ќиңүчеләр “Иң яхшы мәктәп коллективы (16-18 яшьлекләр)” һәм “Иң яхшы студентлар театры” дигән ике номинациядә билгеләнәчәк. Спектакльдә башкарылган җырның француз авторыныкы яки театр төркемендә катнашучыныкы булу шарт. Моннан тыш, жюри катнашучыларның актерлык осталыгына, тавышына, дикциясенә, режиссурага һәм француз телен белү дәрәҗәсенә дә игътибар итәчәк.

Фестивальнең төп җиңүчесенә Франциягә бару өчен юллама тапшырыла. Шул ук вакытта “Иң яхшы актер”, “Иң яхшы актриса”, “Иң яхшы спектакль” категорияләрендә дә призлар каралган. Жюриның исә үз махсус бүләге булачак.

Француз телендәге театрларның Бөтенроссия фестивале Франциянең Россиядәге Илчелеге ярдәме белән, Казандагы “Альянс Франсез” иҗтимагый оешмасы тарафыннан оештырыла. Аның төп максаты — Россиядә француз теленә кызыксыну уяту.