И.Метшин чит ил журналистларын 27 июнь - Яшьләр көнендә мэр кунаклары буларак чакырды

9 апрельдә Казан ратушасында мэр Илсур Метшин «Россия бизнесы атналыгы» кысаларында Мәскәүнең «Пресс Холл» коммуникацион группасы оештырган пресс-тур барышында Казанга килгән чит ил журналистларын кабул итте. Очрашуда «Татмедиа» агентлыгы җитәкчесе Марат Моратов һәм агентлык вәкилләре дә катнашты.

«Пресс Холл» коммуникацион группасы директорлар советы рәисе Михаил Дворкович җитәкчелегендәге «Reuters», «NewsMoscow», «Times», «The National», TK «Russia Today», ТК «Вести», «Блумберг», «Business New Europe», «Российская газета» журналистларыннан торган төркем Россия төбәкләрендә 5 зур шәһәрдә булу нияте белән сәфәр чыккан һәм Казанга кадәр Екатеринбургта булырга өлгергән. Алга таба алар Түбән Новгородка, аннары Санкт-Петербург һәм Мәскәүгә юл алачак. Кичә ТР Премьер-министры Рөстәм Миңнеханов белән очрашканнан соң, алар «Казан Кремле» музей-тыюлыгында булдылар. Мэр Илсур Метшин белән әңгәмәләшкәч, шәһәрнең сәнәгать предприятиеләренә барачаклар.

Журналистларны сәламләп, шәһәр җитәкчесе сүзен Казанның дөнья күләмендә җиңүеннән – 2013 елда үзендә Универсиада үткәрергә хокук яулавы вакыйгасыннан башлады. 1000 еллык тарихлы Казанның Татарстан һәм Россиянең икътисади, фәнни, мәдәни, спорт тормышында роле зур булуын искәртеп, шушы олуг юбилейны бәйрәм итү, аннан соң Шень-Женьга 2011 елда Универсиада үткәрү хокукын нибары 2 тавышка оттыру вакыйгасын искә алды. 200 елдан артык тарихы булган Казан университетының Мәскәү университетыннан соң иң өлкәне, Казан югары уку йортларының фән өлкәсендәге казанышлары бихисап, дип, галимнәрнең ил, дөнья фәненә керткән ачышларын һәм фәнни хезмәтләрен барлады, шәһәрнең бүгенге тормышы хакында мәгълүмат бирде.

«Татарстан җитәкчелегенең спортка мөнәсәбәтен бер генә мисалда күрсәтәсем килә: республика Президенты көн саен 1,5 чакрым араны йөзеп үтә, һәр елны 400әр чакрым дигән сүз бу. Ни үкенеч, без алай ук булдыра алмыйбыз әле», - дип, шәһәр башлыгы спортчыларыбызның ил һәм дөнья күләмендә спорттагы уңышларына тукталды.

«2013 елгы Универсиада дирекциясе» муниципаль унитар предприятиесе директоры Владимир Леонов исә Казанда үткәреләчәк Универсиадага әзерлек мәсьәләләрен аерым яктыртты. Универсиадада катнашкан 60 процент спортчының аннары Олимпия уеннарында көч сынашуын һәм югары уку йортлары саны буенча Казанның Россиядә III урында торуын искәртеп, Универсиадага 25 төр спорт уены өчен Казанда 64 спорт объекты булырга тиешлеген белдерде, яңа төзеләчәкләре хакында слайдлар ярдәмендә белешмәләр бирде. «Шәһәрдәге югары уку йортларының спорт комплексларын Бөтендөнья студентлар спорт уеннары башланганчы төзекләндерүгә зур игътибар биреләчәк. Универсиадада 11-12 мең спортчы катнашачагын һәм уеннарны тамаша кылырга 100 мең чамасы кеше киләчәген исәпкә алып, кунакханәләр фонды 25 процентка арттырыла», - диде ул. Болардан тыш, аның сүзләренчә, «Казан» аэропортын реконструкцияләүгә 10 млрд. сум акча таләп ителә. Универсиада бюджеты - 5-6 млрд. АКШ доллары, ягъни 100 млрд. сумнан артык. Мэр И.Метшин шуларның 70 процентын федераль бюджет каплаячагын, калганы республика бюджеты хисабына финанслануын белдерде. Юлларны төзекләндерүгә һәм яңаларын салуга 80 млрд., спорт объектларына 30 млрд., куркынычсызлык тәэмин итүгә 10 млрд. тирәсе акча китәчәк, диде ул.

Журналистларның бер-бер артлы сорауларына җавап биреп, И.Метшин: «Казан Россиянең өченче башкаласы дип таныла. Россиядә бәлки бер генә сәяси үзәк булырга тиештер, ләкин икътисади, мәдәни, спорт һәм башка өлкәләр буенча үзәкләр төбәкләрдә булырга тиеш, Мәскәү белән түгел, ә Санкт-Петербург, Түбән Новгород кебек зур шәһәрләр белән шулар буенча без ярышырга әзер», - дип игълан итте. Узган елны Казан үзәгендә үткәрелгән «Сотворение мира» фестиваленең әһәмиятенә тукталып, төрле илләрнең сәясәтчеләре, җитәкчеләре үзара килешә алмаган, хәтта килешү өчен бер өстәл артына утыра алмаган заманда сәнгать әһелләре, аларга үрнәк күрсәтеп, бер сәхнәдә – Казан сәхнәсендә җыелып чыгыш ясадылар, дип басым ясап әйтте ул. Очрашу азагында Илсур Метшин журналистларны Казан Сабан туена, бигрәк тә 27 июнь – Россиядә Яшьләр көнендә мэрның кунаклары сыйфатында килергә чакырды.