“Татарстанда иң яхшылар!” конкурсында катнашу өчен заявкалар кабул ителә башлады

Татарстанда кулланучылар базары предприятиеләреннән “Татарстанда иң яхшылар!” дип исемләнгән еллык смотр–конкурста катнашу өчен заявкалар кабул ителә башлады, дип хәбәр итә ТР Кулланучылар берлеге.

Смотр–конкурс ТР Хөкүмәте, кулланучыларның хокукларын яклау һәм кеше иминлеге өлкәсендә күзәтчелек Федераль хезмәтенең ТР буенча идарәсе, ТР Сәүдә–сәнәгать палатасы, Татарстан Кулланучылар берлеге ярдәме белән кулланучыларның хокукларын яклау буенча комплекслы программа нигезендә, республика предприятиеләренең җитештерелгән продукция һәм күрсәтелгән хезмәтләрнең сыйфатын һәм көндәшлеккә сәләтлелеген яхшыртуга карата кызыксынуын арттыру, намуслы эшкуарлыкны пропагандалау, республикада җитештерелгән тауарларга һәм күрсәтелгән хезмәтләргә халыкның ихтыяҗын арттыру максатыннан үткәрелә.

Катнашучыларга белдерелгән төп шартлар түбәндәгеләр: хезмәт күрсәтү культурасы һәм тауарларның, хезмәтләрнең сыйфаты турында кулланучылар, дәүләт контроле һәм күзәтчелек органнары вәкилләреннән уңай фикерләр булу, продуктларның куркынычсызлык дәрәҗәсе, гарантия йөкләмәләрен дә кертеп, продуктларның сыйфат күрсәткечләренең тотрыклылык дәрәҗәсе.

Конкурс берничә номинация буенча үтәчәк.

Тапшырылган заявкалар составында контрольлек итүче органнар, кулланучылар оешмасы һәм эшкуарлар берләшмәсе вәкилләре булган эксперт комиссиясе тарафыннан каралачак. Лауреатларны бүләкләү тантанасы Бөтендөнья сыйфат атналыгы барган көннәрдә ТР Сәүдә–сәнәгать палатасының конгресслар залында үтәчәк.