Министрлар Кабинетында ТР да цифрлы телевидение челтәрен үстерү хакында сөйләшү узды

6 апрель көнне ТР Министрлар Кабинетында Премьер-министр Рөстәм Миңнехановның РФ сәнәгать һәм сәүдә министры урынбасары Юрий Борисов белән очрашуы вакытында республикада цифрлы телевидение челтәрен үстерү мәсьәләләре хакында сүз барды. Шулай ук 2013 елда Казанда җәйге Универсиаданы уздыру өчен телекоммуникация инфраструктурасын төзү хакында да сөйләшү булды, дип хәбәр итә Министрлар Кабинетының матбугат хезмәте.

Рөстәм Миңнеханов сүзләренә караганда, цифрлы телевидение челтәрен үстерү авыл районнары өчен аеруча актуаль. Бу проектны гамәлгә ашыру Татарстанның барлык территориясендә цифрлы телерадиочелтәрне җәелдерү мөмкинлеген бирә. Хөкүмәт башлыгы искәртүенчә, республика предприятиеләре үзебездә цифрлы телевидение өчен кирәкле кабул итү һәм тапшыргыч аппаратуларны җитештерүне компонетлар белән тәэмин итәргә әзер. “Безнең предприятиеләрнең җитештерү куәтләре аларга цифрлы телевидениене үстерү буенча төбәк программасында катнашырга, кабул итү һәм тапшыргыч аппаратураларны серияләп җитештерергә мөмкинлек бирә”, -дип билгеләп узды премьер. Хөкүмәт башлыгы 2013 елда Универсиаданы уздыру өчен кирәкле инфраструктураны (телекоммуникацияләр, челтәрләр, цифрлы телерадиотапшырулар) әзерләү мөһимлегенә аерым игътибар юнәлтте. Аның сүзләренә караганда, барлык проблемалы мәсьәләләрне чишү һәм кирәкле системаларны төзү өчен инде хәзердән үк бу мөһим чарага әзерлек кирәк. Биредә эшләнгән система алга таба Сочида кышкы Олимпия уеннарын оештыруда кулланылачак.

РФ сәнәгать һәм сәүдә министры урынбасары Юрий Борисов Татарстанны заманча технологияләрне кулланылышка кертү һәм телекоммуникация инфраструктурасы буенча ил төбәкләре арасында иң алдынгысы дип билгеләп үтте. Аның фикеренчә, цифрлы телевидение проектын тормышка ашыру аның өчен кирәкле кабул итү һәм тапшыргыч җиһазларны җитештерүгә үзебезнең предприятиеләрне җәлеп итәргә юл ача. Бу мәсьәләне чишүдә Телерадиотапшырулар өчен аппаратура җитештерүчеләр ассоциациясенә зур роль бирелә.

Министрлар Кабинетында узган бүгенге очрашуда Телерадиотапшырулар өчен аппаратура җитештерүчеләр ассоциациясе предиденты Надежда Вилкова да катнашты.