И.Метшин: «Казан ирешелгән югары дәрәҗәсен саклап калыр өчен тырышырга тиеш»

6 апрельдә Казан шәһәре Башкарма комитеты бүлекләре һәм муниципаль берәмлекләр органнары җитәкчеләренең «дүшәмбе киңәшмәсе»ндә мэр Илсур Метшин: «Казанның Роспатентта «Россиянең өченче башкаласы» товар билгесен рәсмиләштерү – Татарстан башкаласында яшәеш сыйфатын күтәрү буенча җитди эшләү өчен этәргеч булып тора. Казанлылар һәм шәһәребез кунаклары Казанны иң уңайлы һәм куркынычсызлык буенча иң ышанычлы шәһәр дип санасын, күбрәк бала тусын һәм үлүчеләр саны азрак булсын өчен тырышасы бар», - дигән фикерен белдерде.

Аның сүзләренчә, тарих Казан башкала булганчы ук та күләгәдә калган шәһәр булмаганлыгын раслый, хәзер исә Казанның «Россиянең өченче башкаласы» дигән югары дәрәҗәсен саклап калу һәм үстерү өчен тырышырга кирәк. «Федераль массакүләм матбугат чараларында, Интернетта Казанның шушы товар билгесен куллану хокукына ия булуына карата дискуссия оештырылуы көтелмәгәнрәк хәл булды. Без үзебез моңа тыныч карыйбыз», - дип, төрле илләрдә рәсми игълан ителгән башкала, мәсәлән, Швейцариядә Берн, АКШта Вашингтон, үзенең халкына яшәү өчен уңайлылык ягыннан андый дәрәҗәгә ия булмаган очраклар да бар, дип кисәтте.