Рөстәм Миңнеханов “Алабуга” махсус икътисади зонасында киңәшмә үткәрде

2 апрель көнне ТР Премьер–министры Рөстәм Миңнеханов Алабугада булды. Ул “Алабуга” махсус икътисади зонасы территориясендә махсус икътисади инфраструктура төзелешенә бәйле мәсьәләләр буенча киңәшмә үткәрде.

Зонаның гомуми территориясе 20 квадрат чакрым тәшкил итә. Инфраструктура төзелеше ике чиратта алып барыла. Беренче чиратның тәүге комплексы объектлары (аңа административ–эшлекле үзәк, таможня терминалы, контейнер мәйданчыгы керә) 2008 елның гыйнварында файдалануга тапшырылды.

2008 елның ахырында икенче комплекс объектлары (мәйданчык эчендәге электр белән тәэмин итү челтәрләре, ярдәмче станцияләр, су үткәргеч, канализация, дренаж системасы, җылылык, газ белән тәэмин итү челтәрләре, югары тизлекле элемтә линияләре) сафка басты. 2009 елның 1 гыйнварына барлыгы 220 чакрым озынлыкта инженер коммуникацияләре, 4,12 чакрым озынлыкта – автомобиль, 4,1 чакрым озынлыкта тимер юллар, саклау сигнализациясе төзелде һәм 20 чакрым озынлыкта койма тотылды.

Рөстәм Миңнеханов шулай ук якын көннәрдә ачылачак яңа автовокзал бинасында булды, “Бердәм Россия” спорт комплексын карады, күптән түгел яңа бинага күчкән күчемсез милек кадастры Федераль агентлыгы һәм Теркәү палатасы бүлекләренең эшчәнлеге белән танышты.