ТР фермерлары Испаниянең «Bastet-grupp» компаниясе белән 1 млрд. сумга килешү имзалаячак

3 апрельдә Татарстанның Фермерлар һәм крестьян хуҗалыклары ассоциациясе Испаниянең «Bastet-grupp» компаниясе белән 6 элеваторга җиһазлар китерүне күздә тоткан килешүгә кул куячак. Республика фермерлары әлеге элеваторларда ашлык сакларга ниятли. 1 миллиард сум торучы җиһазларны Испания компаниясе китерәчәк. Бу хакта “Татар–информ” агентлыгына Татарстанның Фермерлар һәм крестьян хуҗалыклары ассоциациясе рәисе Камияр Байтимеров хәбәр итте.

Испания вәкилләре Казанга компания башлыгы Хуан Луис җитәкчелегендә киләчәк. Беренче өч “фермер” элеваторы Балык Бистәсе, Буа һәм Алексеевски районнарында урнаштырылыр дип көтелә. Бу фермерларга ашлыкны эчке базарда гына түгел, тышкы базарда да сатарга мөмкинлек бирәчәк.

Моннан тыш, алар Россиядә ел саен үткәрелүче ашлык интервенциясендә дә катнаша ала. Фермерлар элегрәк моны эшли алмады. Шул ук вакытта Испания белән хезмәттәшлекне Татарстанда фермерлык хәрәкәтенең тагын да югарырак үсеш баскычына күтәрелүе турында сөйләүче факт буларак карарга мөмкин.