Бүгеннән «Студент язы-2009» конкурсы башлана

2-20 апрель көннәрендә «Студент язы-2009» XV Казан вузара фестиваленың конкурс көннәре үткәрелә, Гала-концерт исә 30 апрельдә Казан дәүләт университетының «УНИКС» мәдәни-спорт комплексында була. Фестивальда җиңүчеләр бу юлы Казанда үткәреләчәк «Россия студент язы-2009» Бөтенроссия фестиваленда катнашу хокукына ия була.

Татарстан башкаласындагы 23 югары уку йорты арасында уздырыла торган әлеге фестивальны Казан шәһәре мэриясе, шәһәрнең балалар һәм яшьләр эшләре буенча комитеты, югары уку йортларының студентлар клублары белән эшләү буенча үзәге һәм республиканың югары уку йортлары белән берлектә оештырган. Ел саен 45 меңләп студент һәм югары уку йортлары укытучылары әлеге фестивальда катнаша, тамаша залларына 17 меңнән артык кеше җыела һәм фестивальның популярлыгы Казан яшьләре арасында елдан-ел арта бара.

Мэриядән алынган әлеге мәгълүматта шулай ук узган елгы фестивальдан башлап журналистика буенча кертелгән конкурс эшләре нигезендә быел «Веснушка» студентлар газетасы чыгачагы, конкурс һәм фестиваль барышында төшерелгән фоторепортажлар күргәзмәгә куелачагы, ә видеорепортажлар телевидение буенча күрсәтеләчәге турында хәбәр ителә.