Татарстанга Австрия, Германия, Швейцария, Голландиянең хәрби атташелары делегациясе килде

Татарстанга Австрия, Германия, Швейцария һәм Голландиянең хәрби атташелары делегациясе килде. Сәфәрнең максаты – Татарстан, аның икътисади, сәнәгый потенциалы белән якыннан танышу. Составында Австрия Республикасы Илчелеге каршындагы оборона мәсьәләләре буенча атташе Эрих Зимбюргер, Швейцария Конфедерациясе, ФРГ, Нидерланд Корольлеге Илчелекләре каршындагы оборона мәсьәләләре буенча атташелар – Урс Зульзер, Оливер Вельниц, Рейн Схравендеел булган делегация сәфәрне ТР Сәнәгать һәм сәүдә министрлыгында очрашудан башлады. Министр урынбасары Линар Латыйпов аларга Татарстанның географик урыны, икътисади һәм сәнәгый куәте, биредә яшәүче милләтләр һәм конфессияләр хакында җентекле мәгълүмат бирде.

Австрия Республикасы Илчелеге каршындагы оборона мәсьәләләре буенча атташе Эрих Зимбюргерның Казанга 3 нче тапкыр килүе. Күптән түгел генә ул Австриянең РФ дәге Гадәттән тыш һәм Тулы вәкаләтле илчесе җитәкчелегендәге делегация белән бездә булып киткән иде. Калган атташеларның бу - Татарстанга тәүге сәфәре. Эрих Зюмбергер аңлатуынча, Россия Мәскәү белән генә чикләнми. Ул үзе Россиядә 6 ел эшләү дәверендә төрле делегацияләр составында Калининградтан Владивостокка кадәр төбәкләрдә булырга өлгергән. “Россия климатик зоналары, анда яшәүче халыкларның күптөрлелеге, төбәләре белән аерылып тора. Ђлегә без бу ил турында аз беләбез”, - дип белдерде ул очрашуда. Атташелар, елга бер тапкыр, Россиянең аерым бер төбәгенә танышу сәфәре белән чыгуны традиция итеп алган. Татарстан аларда төньяк белән көньякны, көнчыгыш һәм көнбатышны тоташтыручы Россия үзәге буларак зур кызыксыну уята. Кунакларны республиканың бренды булган предприятиеләрнең 3 се - “КАМАЗ”, “Түбән Кама нефтехим”, “Казан вертолет заводы” ААЌ аеруча кызыксындырды. Алар сәфәр барышында Сәнәгать һәм сәүдә министрлыгында әлеге предприятиеләр вәкилләре белән адреслы очрашулар да уздырачак.

Ике көнлек сәфәр программасына шулай ук ТР Президенты каршындагы Халыкара мәсьәләләр буенча Дәүләт киңәшчесе Тимур Акулов белән очрашу, Казан Кремле, Кол Шәриф мәчете белән танышу каралган.