“Россия студентлар язы – 2009” фестиваленең финалы майда Казанда уза

Агымдагы елның 13-19 маенда Казан шәһәре студентлар иҗатына ярдәм итүче “Россия студентлар язы – 2009” фестивале финалына чыгучыларны кабул итәчәк. Ђлеге фестивальнең финалы май аенда Татарстан Республикасы башкаласы Казанда узачак. Бүген оештыру комитеты әгъзалары ТР Премьер-министры Рөстәм Миңнеханов җитәкчелегендә фестивальгә әзерлек һәм уздыру мәсьәләләре турында фикер алышты. Бу хакта ТР Министрлар Кабинетының матбугат хезмәте хәбәр итә.

ТР Яшьләр эшләре, спорт һәм туризм министры урынбасары Андрей Кондратьев хәбәр иткәнчә, Казан инде 2001 елда “Россия студентлар язы” фестивалендә катнашучыларны кабул иткән иде.

Гомумән алганда, фестиваль үз эченә 62 – төбәк һәм 11 төбәкара проектларны ала. Ел саен чараларда бөтен ил буенча 200 мең студент катнаша. Татарстан яшьләре шулай ук фестиваль программаларында актив катнаша – чараларга 23 вуз коллективын җәлеп итү көтелә. Быел “Россия студент язы – 2009” фестивале 13-19 майда узачак. Студентлар коллективлары 13 майда килә башлый. Фестиваль 14 майда тантаналы рәвештә ачылачак. Шул ук көнне фестивальдә катнашучылар һәм Казан вузлары студентлары Татарстан башкаласы урамнары буйлап сәламәт яшәү рәвеше алып бару өчен акциягә чыгачак.

Аннан соң 15, 16 һәм 17 майда иҗат мәйданчыкларында конкурслар һәм башка чаралар булачак. 18 майда фестивальгә нәтиҗәләр ясалачак, гала-концерт һәм җиңүчеләрне бүләкләү булачак.

Казанга фестивальгә кунак булып Россиянең атказанган артисты Андрей Биль, хореограф Егор Дружинин, шоумен Сергей Минаев, пародист Александр Песков киләчәк. “Россия студентлар язы - 2009” кысаларындагы чараларда РФ Спорт, туризм һәм яшьләр сәясәте министры Виталий Мутко, РФ Мәгариф һәм фән министры Андрей Фурсенко һәм башкалар катнаша.

Фестивальнең сметасы федераль, республика һәм муниципаль бюджетлар чараларыннан формалаштырылган. Андрей Кондратьв билгеләп үткәнчә, фестивальнең конкурслар барган мәйданчыкларыннан турыдан-туры Интернет-трансляцияләр оештырырга планлаштырыла. Конкурслар С.Сәйдәшев исемендәге Зур концертлар залында, “Корстон” мәдәни-күңел ачу комплексында, УНИКС концерт-спорт комплексында, В.Качалов һәм Г.Камал исемендәге драма театрларында, “Ак Барс” яшьләр үзәгендә узачак.