Р.Миңнеханов: “Ел ахырына Универсиаданың объектларын проектлаштыруны тәмамлый алабыз"

23 мартта Сочида Физкультура һәм спорт советы утырышында Татарстанның Премьер-министры Рөстәм Миңнеханов 2013 елгы Универсиадага әзерлек турында чыгыш ясады.

Рөстәм Миңнеханов Россия Президенты Дмитрий Медведевка, Хөкүмәт җитәкчесе Владимир Путинга 2013 елда Универсиада үткәрү хокукы өчен көрәштә теләктәшлек күрсәткәннәре өчен рәхмәт белдерде.

ТР Премьер-министры Универсиаданы оештыру комитетына 64 спорт корылмасының исемлеге һәм кайда урнашуы турында мәгълүмат тапшырылды, дип белдерде. Р.Миңнеханов сүзләренчә, бу исемлектәге 28 объект эшли инде, шулай ук федераль бюджет хисабына төзелергә тиешле объектлар исемлеге әзер.

Рөстәм Миңнеханов билгеләп үткәнчә, 17 мартта Россия Хөкүмәте җитәкчесенең беренче вице-премьеры Игорь Шувалов рәислегендә оештыру комитеты утырышы үтте. Анда объектлар исемлеге һәм федераль бюджет хисабына төзелергә тиешле объектлар исемлеге дә расланган.

Казан мэриясе яңа объектлар өчен гомуми кадастра хакы 18,2 миллиард сум булган 136 га җир участогы бүлеп бирде. Р.Миңнеханов билгеләп үткәнчә, Универсиада объектларын инженер челтәренә тоташтыру буенча техник шартлар тудырылган. “Шулай итеп, үз вакытында финанслаган очракта агымдагы елда Универсиаданың барлык объектларын проектлаштыруны тәмамларга һәм 16 яңа спорт объекты төзелеше эшләрен башларга мөмкинлек бирә торган эшләр комплексы башкарылды”, - дип белдерде Рөстәм Миңнеханов.

ТР Хөкүмәте Рәисе утырышта катнашучыларга республика җаваплы булган спорт объектлары төзелеше хакында мәгълүмат бирде. Спорт комплексы 2009 елның көзендә, Көрәшчеләр сарае 2009 ел ахырында, Теннис академиясе 2010 ел ахырында төзелеп бетәчәк. 2013 елга кадәр юл-урам челтәрен һәм Казанның пассажирлар транспорты системасын үстерү программасын эшләү дәвам итә. Хисап 15 апрельгә кадәр тәкъдим ителәчәк.

Р.Миңнеханов сүзләренчә, республика “Казан” Халыкара аэропортын модернизацияләүгә аеручы игътибар бирә. Ул тулысынча шәхси инвесторлар исәбенә башкарылачак. Инвестпроект әзерләнгән инде. Төп компетенцияләр турындагы килешү нигезендә Универсиаданың башкару дирекциясе оештырыла, гамәлгә куючылар – Россия Хөкүмәте, Россия студентлары спорт берлеге, Татарстан Республикасы Министрлар Кабинеты, Казан мэриясе.